| 1 | MTותקרבנה בנות צלפחד בן חפר בן גלעד בן מכיר בן מנשׁה למשׁפחת מנשׁה בן יוסף ואלה שׁמות בנתיו מחלה נעה וחגלה ומלכה ותרצה |
| SPותקרבנה בנות צלפחד בן חפר בן גלעד בן מכיר בן מנשׁה למשׁפחות מנשׁה בן יוסף ואלה שׁמות בנתיו מחלה ונעה חגלה מלכה ותרצה | |
| 2 | MTותעמדנה לפני משׁה ולפני אלעזר הכהן ולפני הנשׂיאם וכל העדה פתח אהל מועד לאמר |
| SPותעמדנה לפני משׁה ולפני אלעזר הכהן ולפני הנשׂיאים וכל העדה פתח אהל מועד לאמר | |
| 3 | MTאבינו מת במדבר והוא לא היה בתוך העדה הנועדים על יהוה בעדת קרח כי בחטאו מת ובנים לא היו לו |
| SPאבינו מת במדבר והוא לא היה בתוך העדה הנועדים על יהוה בעדת קרח כי בחטאו מת אבינו ובנים לא היה לו | |
| 4 | MTלמה יגרע שׁם אבינו מתוך משׁפחתו כי אין לו בן תנה לנו אחזה בתוך אחי אבינו |
| SPלמה יגרע שׁם אבינו מתוך משׁפחתו כי אין לו בן תנו לנו אחזת נחלה בתוך אחי אבינו | |
| 5 | MTויקרב משׁה את משׁפטן לפני יהוה |
| SPויקרב משׁה את משׁפטן לפני יהוה | |
| 6 | MTויאמר יהוה אל משׁה לאמר |
| SPוידבר יהוה אל משׁה לאמר | |
| 7 | MTכן בנות צלפחד דברת נתן תתן להם אחזת נחלה בתוך אחי אביהם והעברת את נחלת אביהן להן |
| SPכן בנות צלפחד דברות נתן תתן להן אחזת נחלה בתוך אחי אביהן והעברת את נחלת אביהן להן | |
| 8 | MTואל בני ישׂראל תדבר לאמר אישׁ כי ימות ובן אין לו והעברתם את נחלתו לבתו |
| SPואל בני ישׂראל תדבר לאמר אישׁ כי ימות ובן אין לו ונתתם את נחלתו לבתו | |
| 9 | MTואם אין לו בת ונתתם את נחלתו לאחיו |
| SPואם אין לו בת ונתתם את נחלתו לאחיו | |
| 10 | MTואם אין לו אחים ונתתם את נחלתו לאחי אביו |
| SPואם אין לו אחים ונתתם את נחלתו לאחי אביו | |
| 11 | MTואם אין אחים לאביו ונתתם את נחלתו לשׁארו הקרב אליו ממשׁפחתו וירשׁ אתה והיתה לבני ישׂראל לחקת משׁפט כאשׁר צוה יהוה את משׁה |
| SPואם אין אחים לאביו ונתתם את נחלתו לשׁארו הקרוב אליו ממשׁפחתו ויירשׁ אתו והיתה לבני ישׂראל לחקת משׁפט כאשׁר צוה יהוה את משׁה | |
| 12 | MTויאמר יהוה אל משׁה עלה אל הר העברים הזה וראה את הארץ אשׁר נתתי לבני ישׂראל |
| SPוידבר יהוה אל משׁה לאמר עלה אל הר העברים הזה וראה את הארץ אשׁר נתתי לבני ישׂראל | |
| 13 | MTוראיתה אתה ונאספת אל עמיך גם אתה כאשׁר נאסף אהרן אחיך |
| SPוראית אתה ונאספת אל עמך גם אתה כאשׁר נאסף אהרן אחיך | |
| 14 | MTכאשׁר מריתם פי במדבר צן במריבת העדה להקדישׁני במים לעיניהם הם מי מריבת קדשׁ מדבר צן |
| SPאשׁר מריתם את פיי במדבר צן במריבת העדה להקדישׁני במים לעיניהם הם מי מריבת קדשׁ מדבר צן | |
| 15 | MTוידבר משׁה אל יהוה לאמר |
| SPוידבר משׁה אל יהוה לאמר | |
| 16 | MTיפקד יהוה אלהי הרוחת לכל בשׂר אישׁ על העדה |
| SPיפקד יהוה אלהי הרוחות לכל הבשׂר אישׁ על העדה | |
| 17 | MTאשׁר יצא לפניהם ואשׁר יבא לפניהם ואשׁר יוציאם ואשׁר יביאם ולא תהיה עדת יהוה כצאן אשׁר אין להם רעה |
| SPאשׁר יצא לפניהם ואשׁר יבוא לפניהם ואשׁר יוציאם ואשׁר יביאם ולא תהיה עדת יהוה כצאן אשׁר אין להם רעה | |
| 18 | MTויאמר יהוה אל משׁה קח לך את יהושׁע בן נון אישׁ אשׁר רוח בו וסמכת את ידך עליו |
| SPויאמר יהוה אל משׁה קח לך את יהושׁע בן נון האישׁ אשׁר רוחו בו וסמכת את ידך עליו | |
| 19 | MTוהעמדת אתו לפני אלעזר הכהן ולפני כל העדה וצויתה אתו לעיניהם |
| SPוהעמדת אתו לפני אלעזר הכהן ולפני כל העדה וצוית אתו לעיניהם | |
| 20 | MTונתתה מהודך עליו למען ישׁמעו כל עדת בני ישׂראל |
| SPונתתה מהודך עליו ולמען ישׁמעון כל עדת בני ישׂראל | |
| 21 | MTולפני אלעזר הכהן יעמד ושׁאל לו במשׁפט האורים לפני יהוה על פיו יצאו ועל פיו יבאו הוא וכל בני ישׂראל אתו וכל העדה |
| SPולפני אלעזר הכהן יעמד ושׁאל לו במשׁפט הארים לפני יהוה על פיהו יצא ועל פיהו יבוא הוא וכל בני ישׂראל אתו וכל העדה | |
| 22 | MTויעשׂ משׁה כאשׁר צוה יהוה אתו ויקח את יהושׁע ויעמדהו לפני אלעזר הכהן ולפני כל העדה |
| SPויעשׂ משׁה כאשׁר צוה יהוה אתו ויקח את יהושׁע ויעמדהו לפני אלעזר הכהן ולפני כל העדה | |
| 23 | MTויסמך את ידיו עליו ויצוהו כאשׁר דבר יהוה ביד משׁה |
| SPויסמך את ידו עליו ויצוהו כאשׁר דבר יהוה ביד משׁה ויאמר אליו עיניך הראות את אשׁר עשׂה יהוה לשׁני המלכים האלה כן יעשׂה יהוה לכל הממלכות אשׁר אתה עבר שׁמה לא תיראם כי יהוה אלהיכם הוא הנלחם לכם |