| 1 | MTויאמר יהוה אל אהרן אתה ובניך ובית אביך אתך תשׂאו את עון המקדשׁ ואתה ובניך אתך תשׂאו את עון כהנתכם |
| SPויאמר יהוה אל אהרן אתה ובניך ובית אביך אתך תשׂאו את עון המקדשׁ ואתה ובניך אתך תשׂאו את עון כהנתכם | |
| 2 | MTוגם את אחיך מטה לוי שׁבט אביך הקרב אתך וילוו עליך וישׁרתוך ואתה ובניך אתך לפני אהל העדת |
| SPוגם את אחיך מטה לוי שׁבט אביך הקריב אתך וילוו עליך וישׁרתוך ואתה ובניך אתך לפני אהל העדות | |
| 3 | MTושׁמרו משׁמרתך ומשׁמרת כל האהל אך אל כלי הקדשׁ ואל המזבח לא יקרבו ולא ימתו גם הם גם אתם |
| SPושׁמרו משׁמרתך ומשׁמרת כל האהל אך אל כלי הקדשׁ ואל המזבח לא יקרבו ולא ימותו גם הם גם אתם | |
| 4 | MTונלוו עליך ושׁמרו את משׁמרת אהל מועד לכל עבדת האהל וזר לא יקרב אליכם |
| SPונלוו עליך ושׁמרו את משׁמרת אהל מועד לכל עבדת האהל וזר לא יקרב אליכם | |
| 5 | MTושׁמרתם את משׁמרת הקדשׁ ואת משׁמרת המזבח ולא יהיה עוד קצף על בני ישׂראל |
| SPושׁמרתם את משׁמרת הקדשׁ ואת משׁמרת המזבח ולא יהיה עוד קצף על בני ישׂראל | |
| 6 | MTואני הנה לקחתי את אחיכם הלוים מתוך בני ישׂראל לכם מתנה נתנים ליהוה לעבד את עבדת אהל מועד |
| SPואני הנה לקחתי את אחיכם הלוים מתוך בני ישׂראל לכם מתנה נתנים ליהוה לעבד את עבדת אהל מועד | |
| 7 | MTואתה ובניך אתך תשׁמרו את כהנתכם לכל דבר המזבח ולמבית לפרכת ועבדתם עבדת מתנה אתן את כהנתכם והזר הקרב יומת |
| SPואתה ובניך אתך תשׁמרו את כהנתכם לכל דבר המזבח ולמבית לפרכת ועבדתם עבדת מתנה אתן את כהנתכם והזר הקרב יומת | |
| 8 | MTוידבר יהוה אל אהרן ואני הנה נתתי לך את משׁמרת תרומתי לכל קדשׁי בני ישׂראל לך נתתים למשׁחה ולבניך לחק עולם |
| SPוידבר יהוה אל אהרן ואני הנה נתתי לך את משׁמרת תרומתי לכל קדשׁי בני ישׂראל לך נתתים למשׁחה ולבניך לחק עולם | |
| 9 | MTזה יהיה לך מקדשׁ הקדשׁים מן האשׁ כל קרבנם לכל מנחתם ולכל חטאתם ולכל אשׁמם אשׁר ישׁיבו לי קדשׁ קדשׁים לך הוא ולבניך |
| SPזה יהיה לך מקדשׁי הקדשׁים מן האשׁ כל קרבנם לכל מנחתם ולכל חטאתם ולכל אשׁמם אשׁר יאשׁמו לי קדשׁ קדשׁים לך הוא ולבניך | |
| 10 | MTבקדשׁ הקדשׁים תאכלנו כל זכר יאכל אתו קדשׁ יהיה לך |
| SPבקדשׁ הקדשׁים תאכלנו כל זכר יאכל אתו קדשׁ יהיה לך | |
| 11 | MTוזה לך תרומת מתנם לכל תנופת בני ישׂראל לך נתתים ולבניך ולבנתיך אתך לחק עולם כל טהור בביתך יאכל אתו |
| SPוזה לך תרומת מתנם לכל תנופת בני ישׂראל לך נתתים ולבניך ולבנתיך אתך לחק עולם כל טהור בביתך יאכל אתו | |
| 12 | MTכל חלב יצהר וכל חלב תירושׁ ודגן ראשׁיתם אשׁר יתנו ליהוה לך נתתים |
| SPכל חלב יצהר וכל חלב תירשׁ ודגן ראשׁיתם אשׁר יתנו ליהוה לך נתתים | |
| 13 | MTבכורי כל אשׁר בארצם אשׁר יביאו ליהוה לך יהיה כל טהור בביתך יאכלנו |
| SPבכורי כל אשׁר בארצם אשׁר יביאו ליהוה לך יהיה כל טהור בביתך יאכלנו | |
| 14 | MTכל חרם בישׂראל לך יהיה |
| SPכל חרם בישׂראל לך יהיה | |
| 15 | MTכל פטר רחם לכל בשׂר אשׁר יקריבו ליהוה באדם ובבהמה יהיה לך אך פדה תפדה את בכור האדם ואת בכור הבהמה הטמאה תפדה |
| SPכל פטר רחם לכל בשׂר אשׁר יקריבו ליהוה באדם ובבהמה יהיה לך אך פדה תפדה את בכור האדם ואת בכור הבהמה הטמאה תפדה | |
| 16 | MTופדויו מבן חדשׁ תפדה בערכך כסף חמשׁת שׁקלים בשׁקל הקדשׁ עשׂרים גרה הוא |
| SPופדיו מבן חדשׁ תפדה בערכך כסף חמשׁת שׁקלים בשׁקל הקדשׁ עשׂרים גרה הוא | |
| 17 | MTאך בכור שׁור או בכור כשׂב או בכור עז לא תפדה קדשׁ הם את דמם תזרק על המזבח ואת חלבם תקטיר אשׁה לריח ניחח ליהוה |
| SPאך בכור שׁור או בכור כשׂב או בכור עז לא תפדה קדשׁ הם את דמם תזרק על המזבח ואת חלבם תקטיר אשׁה ריח ניחח ליהוה | |
| 18 | MTובשׂרם יהיה לך כחזה התנופה וכשׁוק הימין לך יהיה |
| SPובשׂרם יהיה לך כחזה התנופה וכשׁוק הימין לך יהיה | |
| 19 | MTכל תרומת הקדשׁים אשׁר ירימו בני ישׂראל ליהוה נתתי לך ולבניך ולבנתיך אתך לחק עולם ברית מלח עולם הוא לפני יהוה לך ולזרעך אתך |
| SPכל תרומת הקדשׁים אשׁר ירימו בני ישׂראל ליהוה נתתי לך ולבניך ולבנתיך אתך לחק עולם ברית מלח עולם הוא לפני יהוה לך ולזרעך אתך | |
| 20 | MTויאמר יהוה אל אהרן בארצם לא תנחל וחלק לא יהיה לך בתוכם אני חלקך ונחלתך בתוך בני ישׂראל |
| SPויאמר יהוה אל אהרן בארצם לא תנחל וחלק לא יהיה לך בתוכם אני חלקך ונחלתך בתוך בני ישׂראל | |
| 21 | MTולבני לוי הנה נתתי כל מעשׂר בישׂראל לנחלה חלף עבדתם אשׁר הם עבדים את עבדת אהל מועד |
| SPולבני לוי הנה נתתי כל מעשׂר בישׂראל לנחלה חלף עבדתם אשׁר הם עבדים את עבדת אהל מועד | |
| 22 | MTולא יקרבו עוד בני ישׂראל אל אהל מועד לשׂאת חטא למות |
| SPולא יקרבו עוד בני ישׂראל אל אהל מועד לשׂאת חטא למות | |
| 23 | MTועבד הלוי הוא את עבדת אהל מועד והם ישׂאו עונם חקת עולם לדרתיכם ובתוך בני ישׂראל לא ינחלו נחלה |
| SPועבד הלוי הוא את עבדת אהל מועד והם ישׂאו עונם חקות עולם לדרתיכם ובתוך בני ישׂראל לא ינחלו נחלה | |
| 24 | MTכי את מעשׂר בני ישׂראל אשׁר ירימו ליהוה תרומה נתתי ללוים לנחלה על כן אמרתי להם בתוך בני ישׂראל לא ינחלו נחלה |
| SPכי את מעשׂר בני ישׂראל אשׁר ירימו ליהוה תרומה נתתיו ללוים לנחלה על כן אמרתי להם בתוך בני ישׂראל לא ינחלו נחלה | |
| 25 | MTוידבר יהוה אל משׁה לאמר |
| SPוידבר יהוה אל משׁה לאמר | |
| 26 | MTואל הלוים תדבר ואמרת אלהם כי תקחו מאת בני ישׂראל את המעשׂר אשׁר נתתי לכם מאתם בנחלתכם והרמתם ממנו תרומת יהוה מעשׂר מן המעשׂר |
| SPואל הלוים תדבר ואמרת אליהם כי תקחו מאת בני ישׂראל את המעשׂר אשׁר נתתי לכם מאתם בנחלתיכם והרמתם ממנו את תרומת יהוה מעשׂר מן המעשׂר | |
| 27 | MTונחשׁב לכם תרומתכם כדגן מן הגרן וכמלאה מן היקב |
| SPונחשׁב לכם תרומתיכם כדגן מן הגרן וכמלאה מן היקב | |
| 28 | MTכן תרימו גם אתם תרומת יהוה מכל מעשׂרתיכם אשׁר תקחו מאת בני ישׂראל ונתתם ממנו את תרומת יהוה לאהרן הכהן |
| SPכן תרימו גם אתם את תרומת יהוה מכל מעשׂרתיכם אשׁר תקחו מאת בני ישׂראל ונתתם ממנו את תרומת יהוה לאהרן הכהן | |
| 29 | MTמכל מתנתיכם תרימו את כל תרומת יהוה מכל חלבו את מקדשׁו ממנו |
| SPמכל מתנתיכם תרימו את כל תרומת יהוה מכל חלבו את מקדשׁו ממנו | |
| 30 | MTואמרת אלהם בהרימכם את חלבו ממנו ונחשׁב ללוים כתבואת גרן וכתבואת יקב |
| SPואמרת אליהם בהרמכם את חלבו ממנו ונחשׁב ללוים כתבואת גרן וכתבואת יקב | |
| 31 | MTואכלתם אתו בכל מקום אתם וביתכם כי שׂכר הוא לכם חלף עבדתכם באהל מועד |
| SPואכלתם אתו בכל מקום אתם ובתיכם כי שׁכר הוא לכם חלף עבדתכם באהל מועד | |
| 32 | MTולא תשׂאו עליו חטא בהרימכם את חלבו ממנו ואת קדשׁי בני ישׂראל לא תחללו ולא תמותו |
| SPולא תשׂאו עליו חטא בהרמכם את חלבו ממנו ואת קדשׁי בני ישׂראל לא תחללו ולא תמותו |