| 1 | MTוידבר יהוה אל משׁה לאמר |
| SPוידבר יהוה אל משׁה לאמר | |
| 2 | MTזאת תהיה תורת המצרע ביום טהרתו והובא אל הכהן |
| SPזאת תהיה תורת המצרע ביום טהרתו והובא אל הכהן | |
| 3 | MTויצא הכהן אל מחוץ למחנה וראה הכהן והנה נרפא נגע הצרעת מן הצרוע |
| SPויצא הכהן אל מחוץ למחנה וראה הכהן והנה נרפא נגע הצרעת מן הצרוע | |
| 4 | MTוצוה הכהן ולקח למטהר שׁתי צפרים חיות טהרות ועץ ארז ושׁני תולעת ואזב |
| SPוצוה הכהן ולקחו למטהר שׁתי צפורים חיות טהרות ועץ ארז ושׁני תולעת ואזוב | |
| 5 | MTוצוה הכהן ושׁחט את הצפור האחת אל כלי חרשׂ על מים חיים |
| SPוצוה הכהן ושׁחטו את הצפור האחת אל כלי חרשׂ על מים חיים | |
| 6 | MTאת הצפר החיה יקח אתה ואת עץ הארז ואת שׁני התולעת ואת האזב וטבל אותם ואת הצפר החיה בדם הצפר השׁחטה על המים החיים |
| SPואת הצפור החיה יקח אתה ואת עץ הארז ואת שׁני התולעת ואת האזוב וטבל אתם ואת הצפור החיה בדם הצפור השׁחוטה על מים החיים | |
| 7 | MTוהזה על המטהר מן הצרעת שׁבע פעמים וטהרו ושׁלח את הצפר החיה על פני השׂדה |
| SPוהזה על המטהר מן הצרעת שׁבע פעמים וטהרו ושׁלח את הצפור החיה על פני השׂדה | |
| 8 | MTוכבס המטהר את בגדיו וגלח את כל שׂערו ורחץ במים וטהר ואחר יבוא אל המחנה וישׁב מחוץ לאהלו שׁבעת ימים |
| SPוכבס המטהר את בגדיו וגלח את כל שׂערו ורחץ במים וטהר ואחר יבוא אל המחנה וישׁב מחוץ לאהלו שׁבעת ימים | |
| 9 | MTוהיה ביום השׁביעי יגלח את כל שׂערו את ראשׁו ואת זקנו ואת גבת עיניו ואת כל שׂערו יגלח וכבס את בגדיו ורחץ את בשׂרו במים וטהר |
| SPוהיה ביום השׁביעי יגלח את כל שׂערו את ראשׁו ואת זקנו ואת גבות עיניו ואת כל שׂערו יגלח וכבס את בגדיו ורחץ את בשׂרו במים וטהר | |
| 10 | MTוביום השׁמיני יקח שׁני כבשׂים תמימים וכבשׂה אחת בת שׁנתה תמימה ושׁלשׁה עשׂרנים סלת מנחה בלולה בשׁמן ולג אחד שׁמן |
| SPוביום השׁמיני יקח שׁני כבשׂים תמימם בני שׁנה וכבשׂה אחת בת שׁנתה תמימה ושׁלשׁה עשׂרנים סלת מנחה בלולה בשׁמן ולג שׁמן אחד | |
| 11 | MTוהעמיד הכהן המטהר את האישׁ המטהר ואתם לפני יהוה פתח אהל מועד |
| SPוהעמיד הכהן המטהר את האישׁ המטהר ואתם לפני יהוה פתח אהל מועד | |
| 12 | MTולקח הכהן את הכבשׂ האחד והקריב אתו לאשׁם ואת לג השׁמן והניף אתם תנופה לפני יהוה |
| SPולקח הכהן את הכבשׂ האחד והקריב אתו לאשׁם ואת לג השׁמן והניף אתם תנופה לפני יהוה | |
| 13 | MTושׁחט את הכבשׂ במקום אשׁר ישׁחט את החטאת ואת העלה במקום הקדשׁ כי כחטאת האשׁם הוא לכהן קדשׁ קדשׁים הוא |
| SPושׁחט את הכבשׂ במקום אשׁר ישׁחטו את החטאת ואת העלה במקום הקדשׁ כי כחטאת כאשׁם הוא לכהן קדשׁ קדשׁים הוא | |
| 14 | MTולקח הכהן מדם האשׁם ונתן הכהן על תנוך אזן המטהר הימנית ועל בהן ידו הימנית ועל בהן רגלו הימנית |
| SPולקח הכהן מדם האשׁם ונתן על תנך אזן המטהר הימנית ועל בהון ידו הימנית ועל בהון רגלו הימנית | |
| 15 | MTולקח הכהן מלג השׁמן ויצק על כף הכהן השׂמאלית |
| SPולקח הכהן מלג השׁמן ויצק על כף הכהן השׂמאלית | |
| 16 | MTוטבל הכהן את אצבעו הימנית מן השׁמן אשׁר על כפו השׂמאלית והזה מן השׁמן באצבעו שׁבע פעמים לפני יהוה |
| SPוטבל הכהן את אצבעו הימנית מן השׁמן אשׁר על כפו השׂמאלית והזה מן השׁמן שׁבע פעמים לפני יהוה | |
| 17 | MTומיתר השׁמן אשׁר על כפו יתן הכהן על תנוך אזן המטהר הימנית ועל בהן ידו הימנית ועל בהן רגלו הימנית על דם האשׁם |
| SPומיתר השׁמן אשׁר על כפו יתן הכהן על תנך אזן המטהר הימנית ועל בהון ידו הימנית ועל בהון רגלו הימנית על דם האשׁם | |
| 18 | MTוהנותר בשׁמן אשׁר על כף הכהן יתן על ראשׁ המטהר וכפר עליו הכהן לפני יהוה |
| SPוהנותר בשׁמן אשׁר על כף הכהן יתן על ראשׁ המטהר וכפר עליו הכהן לפני יהוה | |
| 19 | MTועשׂה הכהן את החטאת וכפר על המטהר מטמאתו ואחר ישׁחט את העלה |
| SPועשׂה הכהן את החטאת וכפר על המטהר מטמאתו ואחר ישׁחט את העלה | |
| 20 | MTוהעלה הכהן את העלה ואת המנחה המזבחה וכפר עליו הכהן וטהר |
| SPוהעלה הכהן את העלה ואת המנחה המזבחה לפני יהוה וכפר עליו הכהן וטהר | |
| 21 | MTואם דל הוא ואין ידו משׂגת ולקח כבשׂ אחד אשׁם לתנופה לכפר עליו ועשׂרון סלת אחד בלול בשׁמן למנחה ולג שׁמן |
| SPואם דל הוא ואין ידו משׂגת ולקח כבשׂ אחד אשׁם לתנופה לכפר עליו ועשׂרון סלת אחד בלול בשׁמן למנחה ולג שׁמן | |
| 22 | MTושׁתי תרים או שׁני בני יונה אשׁר תשׂיג ידו והיה אחד חטאת והאחד עלה |
| SPושׁתי תרים או שׁני בני יונה אשׁר תשׂיג ידו והיה אחד חטאת ואחד עלה | |
| 23 | MTוהביא אתם ביום השׁמיני לטהרתו אל הכהן אל פתח אהל מועד לפני יהוה |
| SPוהביא אתם ביום השׁמיני לטהרתו אל הכהן אל פתח אהל מועד לפני יהוה | |
| 24 | MTולקח הכהן את כבשׂ האשׁם ואת לג השׁמן והניף אתם הכהן תנופה לפני יהוה |
| SPולקח הכהן את כבשׂ האשׁם ואת לג השׁמן והניף אתם תנופה לפני יהוה | |
| 25 | MTושׁחט את כבשׂ האשׁם ולקח הכהן מדם האשׁם ונתן על תנוך אזן המטהר הימנית ועל בהן ידו הימנית ועל בהן רגלו הימנית |
| SPושׁחט את כבשׂ האשׁם ולקח הכהן מדם האשׁם ונתן על תנך אזן המטהר הימנית ועל בהון ידו הימנית ועל בהון רגלו הימנית | |
| 26 | MTומן השׁמן יצק הכהן על כף הכהן השׂמאלית |
| SPומן השׁמן יצק הכהן על כף הכהן השׂמאלית | |
| 27 | MTוהזה הכהן באצבעו הימנית מן השׁמן אשׁר על כפו השׂמאלית שׁבע פעמים לפני יהוה |
| SPוהזה הכהן באצבעו הימנית מן השׁמן אשׁר על כפו השׂמאלית שׁבע פעמים לפני יהוה | |
| 28 | MTונתן הכהן מן השׁמן אשׁר על כפו על תנוך אזן המטהר הימנית ועל בהן ידו הימנית ועל בהן רגלו הימנית על מקום דם האשׁם |
| SPונתן הכהן מן השׁמן אשׁר על כפו על תנך אזן המטהר הימנית ועל בהון ידו הימנית ועל בהון רגלו הימנית על מקום דם האשׁם | |
| 29 | MTוהנותר מן השׁמן אשׁר על כף הכהן יתן על ראשׁ המטהר לכפר עליו לפני יהוה |
| SPוהנותר בשׁמן אשׁר על כף הכהן יתן על ראשׁ המטהר לכפר עליו לפני יהוה | |
| 30 | MTועשׂה את האחד מן התרים או מן בני היונה מאשׁר תשׂיג ידו |
| SPועשׂה את האחד מן התרים או מבני היונה מאשׁר תשׂיג ידו | |
| 31 | MTאת אשׁר תשׂיג ידו את האחד חטאת ואת האחד עלה על המנחה וכפר הכהן על המטהר לפני יהוה |
| SPאת אשׁר תשׂיג ידו את האחד חטאת ואת האחד עלה על המנחה וכפר על המטהר לפני יהוה | |
| 32 | MTזאת תורת אשׁר בו נגע צרעת אשׁר לא תשׂיג ידו בטהרתו |
| SPזאת תורת אשׁר בו נגע צרעת אשׁר לא תשׂיג ידו בטהרתו | |
| 33 | MTוידבר יהוה אל משׁה ואל אהרן לאמר |
| SPוידבר יהוה אל משׁה ואל אהרן לאמר | |
| 34 | MTכי תבאו אל ארץ כנען אשׁר אני נתן לכם לאחזה ונתתי נגע צרעת בבית ארץ אחזתכם |
| SPכי תבאו אל ארץ כנען אשׁר אני נתן לכם לאחזה ונתתי נגע צרעת בבית ארץ אחזתכם | |
| 35 | MTובא אשׁר לו הבית והגיד לכהן לאמר כנגע נראה לי בבית |
| SPובא אשׁר לו הבית והגיד לכהן לאמר כנגע נראה לי בבית | |
| 36 | MTוצוה הכהן ופנו את הבית בטרם יבא הכהן לראות את הנגע ולא יטמא כל אשׁר בבית ואחר כן יבא הכהן לראות את הבית |
| SPוצוה הכהן ופנו את הבית בטרם יבוא הכהן לראות את הנגע ולא יטמא כל אשׁר בבית ואחרי כן יבוא הכהן לראות את הבית | |
| 37 | MTוראה את הנגע והנה הנגע בקירת הבית שׁקערורת ירקרקת או אדמדמת ומראיהן שׁפל מן הקיר |
| SPוראה הכהן את הנגע והנה הנגע בקירות הבית שׁקעררות ירקרקות או אדמדמות ומראהן שׁפל מן הקיר | |
| 38 | MTויצא הכהן מן הבית אל פתח הבית והסגיר את הבית שׁבעת ימים |
| SPויצא הכהן מן הבית אל פתח הבית והסגיר את הבית שׁבעת ימים | |
| 39 | MTושׁב הכהן ביום השׁביעי וראה והנה פשׂה הנגע בקירת הבית |
| SPושׁב הכהן ביום השׁביעי וראה והנה פשׂה הנגע בקירות הבית | |
| 40 | MTוצוה הכהן וחלצו את האבנים אשׁר בהן הנגע והשׁליכו אתהן אל מחוץ לעיר אל מקום טמא |
| SPוצוה הכהן וחלצו את האבנים אשׁר בהן הנגע והשׁליכו אתהן אל מחוץ לעיר אל מקום טמא | |
| 41 | MTואת הבית יקצע מבית סביב ושׁפכו את העפר אשׁר הקצו אל מחוץ לעיר אל מקום טמא |
| SPואת הבית יקצעו מבית סביב ושׁפכו את העפר אשׁר הקיצו אל מחוץ לעיר אל מקום טמא | |
| 42 | MTולקחו אבנים אחרות והביאו אל תחת האבנים ועפר אחר יקח וטח את הבית |
| SPולקחו אבנים אחרות והביאו אל תחת האבנים ועפר אחר יקחו וטחו את הבית | |
| 43 | MTואם ישׁוב הנגע ופרח בבית אחר חלץ את האבנים ואחרי הקצות את הבית ואחרי הטוח |
| SPואם ישׁוב הנגע ופרח בבית אחרי חלצו את האבנים ואחרי הקצות את הבית ואחרי הטח | |
| 44 | MTובא הכהן וראה והנה פשׂה הנגע בבית צרעת ממארת הוא בבית טמא הוא |
| SPובא הכהן וראה והנה פרח הנגע בבית צרעת ממראת בבית טמא הוא | |
| 45 | MTונתץ את הבית את אבניו ואת עציו ואת כל עפר הבית והוציא אל מחוץ לעיר אל מקום טמא |
| SPונתצו את הבית את אבניו ואת עציו ואת כל עפר הבית והוציאו אל מחוץ לעיר אל מקום טמא | |
| 46 | MTוהבא אל הבית כל ימי הסגיר אתו יטמא עד הערב |
| SPוהבא אל הבית כל ימי הסגיר אתו יטמא עד הערב | |
| 47 | MTוהשׁכב בבית יכבס את בגדיו והאכל בבית יכבס את בגדיו |
| SPוהשׁכב בבית יכבס בגדיו והאכל בבית יכבס בגדיו | |
| 48 | MTואם בא יבא הכהן וראה והנה לא פשׂה הנגע בבית אחרי הטח את הבית וטהר הכהן את הבית כי נרפא הנגע |
| SPואם בא יבוא הכהן וראה והנה לא פרח הנגע בבית אחרי הטח את הבית וטהר הכהן את הבית כי נרפא הנגע | |
| 49 | MTולקח לחטא את הבית שׁתי צפרים ועץ ארז ושׁני תולעת ואזב |
| SPולקחו לחטא את הבית שׁתי צפורים ועץ ארז ושׁני תולעת ואזוב | |
| 50 | MTושׁחט את הצפר האחת אל כלי חרשׂ על מים חיים |
| SPושׁחט את הצפור האחת אל כלי חרשׂ על מים חיים | |
| 51 | MTולקח את עץ הארז ואת האזב ואת שׁני התולעת ואת הצפר החיה וטבל אתם בדם הצפר השׁחוטה ובמים החיים והזה אל הבית שׁבע פעמים |
| SPולקח את עץ הארז ואת שׁני התולעת ואת האזוב ואת הצפור החיה וטבל אתם בדם הצפור השׁחוטה ובמים החיים והזה על הבית שׁבע פעמים | |
| 52 | MTוחטא את הבית בדם הצפור ובמים החיים ובצפר החיה ובעץ הארז ובאזב ובשׁני התולעת |
| SPוחטא את הבית בדם הצפור ובמים החיים ובצפור החיה ובעץ הארז ובשׁני התולעת ובאזוב | |
| 53 | MTושׁלח את הצפר החיה אל מחוץ לעיר אל פני השׂדה וכפר על הבית וטהר |
| SPושׁלח את הצפור החיה אל מחוץ לעיר על פני השׂדה וכפר על הבית וטהר | |
| 54 | MTזאת התורה לכל נגע הצרעת ולנתק |
| SPזאת התורה לכל נגע הצרעת ולנתק | |
| 55 | MTולצרעת הבגד ולבית |
| SPולצרעת הבגד ולבית | |
| 56 | MTולשׂאת ולספחת ולבהרת |
| SPולשׂאת ולספחת ולבהרת | |
| 57 | MTלהורת ביום הטמא וביום הטהר זאת תורת הצרעת |
| SPלהורות ביום הטמא וביום הטהור זאת תורת הצרעת |