| 1 | MTויקחו בני אהרן נדב ואביהוא אישׁ מחתתו ויתנו בהן אשׁ וישׂימו עליה קטרת ויקרבו לפני יהוה אשׁ זרה אשׁר לא צוה אתם |
| SPויקחו בני אהרן נדב ואביהוא אישׁ מחתתו ויתנו בהן אשׁ וישׂמו עליהן קטרת ויקריבו לפני יהוה אשׁ זרה אשׁר לא צוה אתם | |
| 2 | MTותצא אשׁ מלפני יהוה ותאכל אותם וימתו לפני יהוה |
| SPותצא אשׁ מלפני יהוה ותאכל אתם וימתו לפני יהוה | |
| 3 | MTויאמר משׁה אל אהרן הוא אשׁר דבר יהוה לאמר בקרבי אקדשׁ ועל פני כל העם אכבד וידם אהרן |
| SPויאמר משׁה אל אהרן הוא אשׁר דבר יהוה לאמר בקריבי אקדשׁ ועל פני כל העם אכבד וידם אהרן | |
| 4 | MTויקרא משׁה אל מישׁאל ואל אלצפן בני עזיאל דד אהרן ויאמר אלהם קרבו שׂאו את אחיכם מאת פני הקדשׁ אל מחוץ למחנה |
| SPויקרא משׁה אל מישׁאל ואל אליצפן בני עזיאל דד אהרן ויאמר אליהם קרבו שׂאו את אחיכם מאת פני הקדשׁ אל מחוץ למחנה | |
| 5 | MTויקרבו וישׂאם בכתנתם אל מחוץ למחנה כאשׁר דבר משׁה |
| SPויקרבו וישׂאו אתם בכיתנותם אל מחוץ למחנה כאשׁר דבר משׁה | |
| 6 | MTויאמר משׁה אל אהרן ולאלעזר ולאיתמר בניו ראשׁיכם אל תפרעו ובגדיכם לא תפרמו ולא תמתו ועל כל העדה יקצף ואחיכם כל בית ישׂראל יבכו את השׂרפה אשׁר שׂרף יהוה |
| SPויאמר משׁה אל אהרן ואל אלעזר ואל איתמר בניו ראשׁיכם לא תפרעו ובגדיכם לא תפרמו ולא תמותו ועל כל העדה יקצף ואחיכם כל בית ישׂראל יבכו את השׂרפה אשׁר שׂרף יהוה | |
| 7 | MTומפתח אהל מועד לא תצאו פן תמתו כי שׁמן משׁחת יהוה עליכם ויעשׂו כדבר משׁה |
| SPומפתח אהל מועד לא תצאו פן תמותו כי שׁמן משׁחת יהוה עליכם ויעשׂו כדבר משׁה | |
| 8 | MTוידבר יהוה אל אהרן לאמר |
| SPוידבר יהוה אל אהרן לאמר | |
| 9 | MTיין ושׁכר אל תשׁת אתה ובניך אתך בבאכם אל אהל מועד ולא תמתו חקת עולם לדרתיכם |
| SPיין ושׁכר אל תשׁתה אתה ובניך אתך בבאכם אל אהל מועד ולא תמותו חקת עולם לדרתיכם | |
| 10 | MTולהבדיל בין הקדשׁ ובין החל ובין הטמא ובין הטהור |
| SPולהבדיל בין הקדשׁ ובין החל ובין הטמא ובין הטהור | |
| 11 | MTולהורת את בני ישׂראל את כל החקים אשׁר דבר יהוה אליהם ביד משׁה |
| SPולהורות את בני ישׂראל את כל החקים אשׁר דבר יהוה אליהם ביד משׁה | |
| 12 | MTוידבר משׁה אל אהרן ואל אלעזר ואל איתמר בניו הנותרים קחו את המנחה הנותרת מאשׁי יהוה ואכלוה מצות אצל המזבח כי קדשׁ קדשׁים הוא |
| SPוידבר משׁה אל אהרן ואל אלעזר ואל איתמר בניו הנותרים קחו את המנחה הנותרת מאשׁי יהוה ואכלוה מצות אצל המזבח כי קדשׁ קדשׁים היא | |
| 13 | MTואכלתם אתה במקום קדשׁ כי חקך וחק בניך הוא מאשׁי יהוה כי כן צויתי |
| SPואכלתם אתה במקום קדושׁ כי חקך וחק בניך היא מאשׁי יהוה כי כן צויתי | |
| 14 | MTואת חזה התנופה ואת שׁוק התרומה תאכלו במקום טהור אתה ובניך ובנתיך אתך כי חקך וחק בניך נתנו מזבחי שׁלמי בני ישׂראל |
| SPואת חזה התנופה ואת שׁוק התרומה תאכלו במקום טהור אתה ובניך ובנתיך אתך כי חקך וחק בניך נתנו מזבחי שׁלמי בני ישׂראל | |
| 15 | MTשׁוק התרומה וחזה התנופה על אשׁי החלבים יביאו להניף תנופה לפני יהוה והיה לך ולבניך אתך לחק עולם כאשׁר צוה יהוה |
| SPשׁוק התרומה וחזה התנופה על אשׁי החלבים יביאו להניף תנופה לפני יהוה והיה לך ולבניך ולבנתיך אתך לחק עולם כאשׁר צוה יהוה | |
| 16 | MTואת שׂעיר החטאת דרשׁ דרשׁ משׁה והנה שׂרף ויקצף על אלעזר ועל איתמר בני אהרן הנותרם לאמר |
| SPואת שׂעיר החטאת דרשׁ דרשׁ משׁה והנה שׂרוף ויקצף על אלעזר ועל איתמר בני אהרן הנותרים לאמר | |
| 17 | MTמדוע לא אכלתם את החטאת במקום הקדשׁ כי קדשׁ קדשׁים הוא ואתה נתן לכם לשׂאת את עון העדה לכפר עליהם לפני יהוה |
| SPמדוע לא אכלתם את החטאת במקום הקדשׁ כי קדשׁ קדשׁים היא ואתה נתן לכם לשׂאת את עון העדה לכפר עליהם לפני יהוה | |
| 18 | MTהן לא הובא את דמה אל הקדשׁ פנימה אכול תאכלו אתה בקדשׁ כאשׁר צויתי |
| SPהן לא הובא את דמה אל הקדשׁ פנימה אכל תאכלו אתה בקדשׁ כאשׁר צויתי | |
| 19 | MTוידבר אהרן אל משׁה הן היום הקריבו את חטאתם ואת עלתם לפני יהוה ותקראנה אתי כאלה ואכלתי חטאת היום הייטב בעיני יהוה |
| SPוידבר אהרן אל משׁה הן היום הקריבו את חטאתם ואת עלתם לפני יהוה ותקראנה אתי כאלה ואכלתי חטאת היום הייטב בעיני יהוה | |
| 20 | MTוישׁמע משׁה וייטב בעיניו |
| SPוישׁמע משׁה וייטב בעיניו |