| 1 | MTוירא יעקב כי ישׁ שׁבר במצרים ויאמר יעקב לבניו למה תתראו |
| SPוירא יעקב כי ישׁ שׁבר במצרים ויאמר יעקב אל בניו למה תתיראו | |
| 2 | MTויאמר הנה שׁמעתי כי ישׁ שׁבר במצרים רדו שׁמה ושׁברו לנו משׁם ונחיה ולא נמות |
| SPויאמר הנה שׁמעתי כי ישׁ שׁבר במצרים רדו שׁם ושׁברו לנו משׁם ונחיה ולא נמות | |
| 3 | MTוירדו אחי יוסף עשׂרה לשׁבר בר ממצרים |
| SPוירדו אחי יוסף עשׂרה לשׁבר בר ממצרים | |
| 4 | MTואת בנימין אחי יוסף לא שׁלח יעקב את אחיו כי אמר פן יקראנו אסון |
| SPואת בנימים אחי יוסף לא שׁלח יעקב את אחיו כי אמר פן יקראנו אסון | |
| 5 | MTויבאו בני ישׂראל לשׁבר בתוך הבאים כי היה הרעב בארץ כנען |
| SPויבאו בני ישׂראל לשׁבר בתוך הבאים כי היה הרעב בארץ כנען | |
| 6 | MTויוסף הוא השׁליט על הארץ הוא המשׁביר לכל עם הארץ ויבאו אחי יוסף וישׁתחוו לו אפים ארצה |
| SPויוסף הוא השׁליט על הארץ והוא המשׁביר לכל עם הארץ ויבאו אחי יוסף וישׁתחוו לו אפים ארצה | |
| 7 | MTוירא יוסף את אחיו ויכרם ויתנכר אליהם וידבר אתם קשׁות ויאמר אלהם מאין באתם ויאמרו מארץ כנען לשׁבר אכל |
| SPוירא יוסף את אחיו ויכרם ויתנכר אליהם וידבר אתם קשׁות ויאמר אליהם מאין באתם ויאמרו מארץ כנען לשׁבר אכל | |
| 8 | MTויכר יוסף את אחיו והם לא הכרהו |
| SPויכר יוסף את אחיו והם לא הכרהו | |
| 9 | MTויזכר יוסף את החלמות אשׁר חלם להם ויאמר אלהם מרגלים אתם לראות את ערות הארץ באתם |
| SPויזכר יוסף את החלמות אשׁר חלם להם ויאמר אליהם מרגלים אתם לראות את ערות הארץ באתם | |
| 10 | MTויאמרו אליו לא אדני ועבדיך באו לשׁבר אכל |
| SPויאמרו אליו לא אדני ועבדיך באו לשׁבר אכל | |
| 11 | MTכלנו בני אישׁ אחד נחנו כנים אנחנו לא היו עבדיך מרגלים |
| SPכלנו בני אישׁ אחד אנחנו כנים אנחנו לא היו עבדיך מרגלים | |
| 12 | MTויאמר אלהם לא כי ערות הארץ באתם לראות |
| SPויאמר אליהם לא כי ערות הארץ באתם לראות | |
| 13 | MTויאמרו שׁנים עשׂר עבדיך אחים אנחנו בני אישׁ אחד בארץ כנען והנה הקטן את אבינו היום והאחד איננו |
| SPויאמרו שׁנים עשׂר עבדיך אחים אנחנו בני אישׁ אחד בארץ כנען והנה הקטן את אבינו היום והאחד איננו | |
| 14 | MTויאמר אלהם יוסף הוא אשׁר דברתי אלכם לאמר מרגלים אתם |
| SPויאמר אליהם יוסף הוא אשׁר דברתי אליכם לאמר מרגלים אתם | |
| 15 | MTבזאת תבחנו חי פרעה אם תצאו מזה כי אם בבוא אחיכם הקטן הנה |
| SPבזאת תבחנו חי פרעה אם תצאו מזה כי אם בבוא אחיכם הקטן הנה | |
| 16 | MTשׁלחו מכם אחד ויקח את אחיכם ואתם האסרו ויבחנו דבריכם האמת אתכם ואם לא חי פרעה כי מרגלים אתם |
| SPשׁלחו מכם אחד ויקח את אחיכם ואתם האסרו ויבחנו דבריכם האמת אתכם ואם לא חי פרעה כי מרגלים אתם ויאמרו לא יוכל הנער לעזב את אביו ועזב את אביו ומת | |
| 17 | MTויאסף אתם אל משׁמר שׁלשׁת ימים |
| SPויאסף אתם אל משׁמר שׁלשׁת ימים | |
| 18 | MTויאמר אלהם יוסף ביום השׁלישׁי זאת עשׂו וחיו את האלהים אני ירא |
| SPויאמר אליהם יוסף ביום השׁלישׁי זאת עשׂו וחיו את האלהים אני ירא | |
| 19 | MTאם כנים אתם אחיכם אחד יאסר בבית משׁמרכם ואתם לכו הביאו שׁבר רעבון בתיכם |
| SPאם כנים אתם אחיכם האחד יאסר בבית משׁמרכם ואתם לכו והביאו את שׁבר רעבון בתיכם | |
| 20 | MTואת אחיכם הקטן תביאו אלי ויאמנו דבריכם ולא תמותו ויעשׂו כן |
| SPואת אחיכם הקטן תביאון אלי ויאמנו דבריכם ולא תמותון ויעשׂו כן | |
| 21 | MTויאמרו אישׁ אל אחיו אבל אשׁמים אנחנו על אחינו אשׁר ראינו צרת נפשׁו בהתחננו אלינו ולא שׁמענו על כן באה אלינו הצרה הזאת |
| SPויאמרו אישׁ אל אחיו אבל אשׁמים אנחנו על אחינו אשׁר ראינו בצרת נפשׁו בהתחננו אלינו ולא שׁמענו על כן באה עלינו כל הצרה הזאת | |
| 22 | MTויען ראובן אתם לאמר הלוא אמרתי אליכם לאמר אל תחטאו בילד ולא שׁמעתם וגם דמו הנה נדרשׁ |
| SPויען ראובן אתם לאמר הלוא דברתי אליכם לאמר אל תחטאו בילד ולא שׁמעתים וגם דמו הנה נדרשׁ | |
| 23 | MTוהם לא ידעו כי שׁמע יוסף כי המליץ בינתם |
| SPוהם לא ידעו כי שׁמע יוסף כי המליץ בינתם | |
| 24 | MTויסב מעליהם ויבך וישׁב אלהם וידבר אלהם ויקח מאתם את שׁמעון ויאסר אתו לעיניהם |
| SPויסב מעליהם ויבך וישׁב אליהם וידבר אליהם ויקח מאתם את שׁמעון ויאסר אתו לעיניהם | |
| 25 | MTויצו יוסף וימלאו את כליהם בר ולהשׁיב כספיהם אישׁ אל שׂקו ולתת להם צדה לדרך ויעשׂ להם כן |
| SPויצו יוסף וימלאו את כליהם בר ולהשׁיב את כספיהם אישׁ על שׂקו ולתת להם צדה לדרך ויעשׂ להם כן | |
| 26 | MTוישׂאו את שׁברם על חמריהם וילכו משׁם |
| SPוישׂאו את שׁברם על חמריהם וילכו משׁם | |
| 27 | MTויפתח האחד את שׂקו לתת מספוא לחמרו במלון וירא את כספו והנה הוא בפי אמתחתו |
| SPויפתח אחד את שׂקו לתת מספה לחמרו במלון וירא את כספו והנה הוא בפי אמתחתו | |
| 28 | MTויאמר אל אחיו הושׁב כספי וגם הנה באמתחתי ויצא לבם ויחרדו אישׁ אל אחיו לאמר מה זאת עשׂה אלהים לנו |
| SPויאמר אל אחיו הושׁב כספי וגם הנה הוא באמתחתי ויצא לבם ויחרדו אישׁ על אחיו לאמר מה זאת עשׂה אלהים לנו | |
| 29 | MTויבאו אל יעקב אביהם ארצה כנען ויגידו לו את כל הקרת אתם לאמר |
| SPויבאו אל יעקב אביהם ארצה כנען ויגדו לו את כל הקרות אתם לאמר | |
| 30 | MTדבר האישׁ אדני הארץ אתנו קשׁות ויתן אתנו כמרגלים את הארץ |
| SPדבר האישׁ אדני הארץ אתנו קשׁות ויתן אתנו כמרגלים את הארץ | |
| 31 | MTונאמר אליו כנים אנחנו לא היינו מרגלים |
| SPונאמר אליו כנים אנחנו לא היינו מרגלים | |
| 32 | MTשׁנים עשׂר אנחנו אחים בני אבינו האחד איננו והקטן היום את אבינו בארץ כנען |
| SPשׁנים עשׂר אחים אנחנו בני אבינו והאחד איננו והקטן היום את אבינו בארץ כנען | |
| 33 | MTויאמר אלינו האישׁ אדני הארץ בזאת אדע כי כנים אתם אחיכם האחד הניחו אתי ואת רעבון בתיכם קחו ולכו |
| SPויאמר אלינו האישׁ אדני הארץ בזאת אדע כי כנים אתם אחיכם האחד הניחו אתי ואת רעבון בתיכם קחו ולכו | |
| 34 | MTוהביאו את אחיכם הקטן אלי ואדעה כי לא מרגלים אתם כי כנים אתם את אחיכם אתן לכם ואת הארץ תסחרו |
| SPוהביאו את אחיכם הקטן אלי ואדעה כי לא מרגלים אתם כי כנים אתם את אחיכם אתן לכם ואת הארץ תסחרו | |
| 35 | MTויהי הם מריקים שׂקיהם והנה אישׁ צרור כספו בשׂקו ויראו את צררות כספיהם המה ואביהם וייראו |
| SPויהיו הם מריקים שׂקיהם והנה אישׁ צרור כספו בשׂקו ויראו את צררות כספיהם הם ואביהם וייראו | |
| 36 | MTויאמר אלהם יעקב אביהם אתי שׁכלתם יוסף איננו ושׁמעון איננו ואת בנימן תקחו עלי היו כלנה |
| SPויאמר אליהם יעקב אביהם אתי שׁכלתם יוסף איננו ושׁמעון איננו ואת בנימים תקחו עלי היו כלנה | |
| 37 | MTויאמר ראובן אל אביו לאמר את שׁני בני תמית אם לא אביאנו אליך תנה אתו על ידי ואני אשׁיבנו אליך |
| SPויאמר ראובן אל אביו לאמר את שׁני בני תמית אם לא אביאנו אליך תנה אתו על ידי ואני אשׁיבנו אליך | |
| 38 | MTויאמר לא ירד בני עמכם כי אחיו מת והוא לבדו נשׁאר וקראהו אסון בדרך אשׁר תלכו בה והורדתם את שׂיבתי ביגון שׁאולה |
| SPויאמר לא ירד בני עמכם כי אחיו מת והוא לבדו נשׁאר וקראהו אסון בדרך אשׁר תלכו בה והורדתם את שׂיבתי ביגון שׁאלה |