| 1 | MTויהי אחר הדברים האלה חטאו משׁקה מלך מצרים והאפה לאדניהם למלך מצרים |
| SPויהי אחר הדברים האלה חטאו משׁקה מלך מצרים והאפה לאדניהם למלך מצרים | |
| 2 | MTויקצף פרעה על שׁני סריסיו על שׂר המשׁקים ועל שׂר האופים |
| SPויקצף פרעה על שׁני סריסיו על שׂר המשׁקים ועל שׂר האפים | |
| 3 | MTויתן אתם במשׁמר בית שׂר הטבחים אל בית הסהר מקום אשׁר יוסף אסור שׁם |
| SPויתן אתם במשׁמר בית שׂר הטבחים אל בית הסחר מקום אשׁר יוסף אסור שׁם | |
| 4 | MTויפקד שׂר הטבחים את יוסף אתם וישׁרת אתם ויהיו ימים במשׁמר |
| SPויפקד שׂר הטבחים את יוסף אתם וישׁרת אתם ויהיו ימים במשׁמר | |
| 5 | MTויחלמו חלום שׁניהם אישׁ חלמו בלילה אחד אישׁ כפתרון חלמו המשׁקה והאפה אשׁר למלך מצרים אשׁר אסורים בבית הסהר |
| SPויחלמו חלום שׁניהם אישׁ חלמו בלילה אחד אישׁ כפתרון חלמו המשׁקה והאפה אשׁר למלך מצרים אשׁר אסורים בבית הסחר | |
| 6 | MTויבא אליהם יוסף בבקר וירא אתם והנם זעפים |
| SPויבא אליהם יוסף בבקר וירא אתם והנם זעפים | |
| 7 | MTוישׁאל את סריסי פרעה אשׁר אתו במשׁמר בית אדניו לאמר מדוע פניכם רעים היום |
| SPוישׁאל את סריסי פרעה אשׁר אתו במשׁמר בית אדניו לאמר מדוע פניכם רעים היום | |
| 8 | MTויאמרו אליו חלום חלמנו ופתר אין אתו ויאמר אלהם יוסף הלוא לאלהים פתרנים ספרו נא לי |
| SPויאמרו אליו חלום חלמנו ופתר אין אתו ויאמר אליהם יוסף הלוא לאלהים פתרנים ספרו נא לי | |
| 9 | MTויספר שׂר המשׁקים את חלמו ליוסף ויאמר לו בחלומי והנה גפן לפני |
| SPויספר שׂר המשׁקים את חלמו ליוסף ויאמר לו בחלמי והנה גפן לפני | |
| 10 | MTובגפן שׁלשׁה שׂריגם והיא כפרחת עלתה נצה הבשׁילו אשׁכלתיה ענבים |
| SPובגפן שׁלשׁה שׂרוגים והיא כאפרחת עלתה נצה הבשׁילו אשׁכלתיה ענבים | |
| 11 | MTוכוס פרעה בידי ואקח את הענבים ואשׂחט אתם אל כוס פרעה ואתן את הכוס על כף פרעה |
| SPוכוס פרעה בידי ואקח את הענבים ואשׂחט אתם על כוס פרעה ואתן את הכוס על כף פרעה | |
| 12 | MTויאמר לו יוסף זה פתרנו שׁלשׁת השׂרגים שׁלשׁת ימים הם |
| SPויאמר לו יוסף זה פתרנו שׁלשׁת השׂרוגים שׁלשׁת ימים הם | |
| 13 | MTבעוד שׁלשׁת ימים ישׂא פרעה את ראשׁך והשׁיבך על כנך ונתת כוס פרעה בידו כמשׁפט הראשׁון אשׁר היית משׁקהו |
| SPבעוד שׁלשׁת ימים ישׂא פרעה את ראשׁך והשׁיבך על כנך ונתתה כוס פרעה בידו כמשׁפט הראישׁון אשׁר היית משׁקהו | |
| 14 | MTכי אם זכרתני אתך כאשׁר ייטב לך ועשׂית נא עמדי חסד והזכרתני אל פרעה והוצאתני מן הבית הזה |
| SPכי אם זכרתני אתך כאשׁר ייטב לך ועשׂית נא עמדי חסד והזכרתני לפרעה והוצאתני מן הבית הזה | |
| 15 | MTכי גנב גנבתי מארץ העברים וגם פה לא עשׂיתי מאומה כי שׂמו אתי בבור |
| SPכי גנוב נגנבתי מארץ העברים וגם פה לא עשׂיתי מאומה כי שׂמו אתי בבור | |
| 16 | MTוירא שׂר האפים כי טוב פתר ויאמר אל יוסף אף אני בחלומי והנה שׁלשׁה סלי חרי על ראשׁי |
| SPוירא שׂר האפים כי טוב פתר ויאמר אל יוסף אף אני בחלמי והנה שׁלשׁה סלי חרי על ראשׁי | |
| 17 | MTובסל העליון מכל מאכל פרעה מעשׂה אפה והעוף אכל אתם מן הסל מעל ראשׁי |
| SPובסל העליון מכל מאכל פרעה מעשׂה אפה והעוף אכל אתם מעל הסל מעל ראשׁי | |
| 18 | MTויען יוסף ויאמר זה פתרנו שׁלשׁת הסלים שׁלשׁת ימים הם |
| SPויען יוסף ויאמר זה פתרנו שׁלשׁת הסלים שׁלשׁת ימים הם | |
| 19 | MTבעוד שׁלשׁת ימים ישׂא פרעה את ראשׁך מעליך ותלה אותך על עץ ואכל העוף את בשׂרך מעליך |
| SPבעוד שׁלשׁת ימים ישׂא פרעה את ראשׁך מעליך ותלא אתך על העץ ואכל העוף את בשׂרך מעליך | |
| 20 | MTויהי ביום השׁלישׁי יום הלדת את פרעה ויעשׂ משׁתה לכל עבדיו וישׂא את ראשׁ שׂר המשׁקים ואת ראשׁ שׂר האפים בתוך עבדיו |
| SPויהי ביום השׁלישׁי יום הולדת את פרעה ויעשׂ משׁתה לכל עבדיו וישׂא את ראשׁ שׂר המשׁקים ואת ראשׁ שׂר האפים בתוך עבדיו | |
| 21 | MTוישׁב את שׂר המשׁקים על משׁקהו ויתן הכוס על כף פרעה |
| SPוישׁב את שׂר המשׁקים על משׁקהו ויתן את הכוס על כף פרעה | |
| 22 | MTואת שׂר האפים תלה כאשׁר פתר להם יוסף |
| SPואת שׂר האפים תלא כאשׁר פתר להם יוסף | |
| 23 | MTולא זכר שׂר המשׁקים את יוסף וישׁכחהו |
| SPולא זכר שׂר המשׁקים את יוסף וישׁכחהו |