| 1 | MTויסע משׁם אברהם ארצה הנגב וישׁב בין קדשׁ ובין שׁור ויגר בגרר |
| SPויסע משׁם אברהם ארץ הנגב וישׁב בין קדשׁ ובין שׁור ויגר בגרר | |
| 2 | MTויאמר אברהם אל שׂרה אשׁתו אחתי הוא וישׁלח אבימלך מלך גרר ויקח את שׂרה |
| SPויאמר אברהם אל שׂרה אשׁתו אחותי היא וישׁלח אבימלך מלך גרר ויקח את שׂרה | |
| 3 | MTויבא אלהים אל אבימלך בחלום הלילה ויאמר לו הנך מת על האשׁה אשׁר לקחת והוא בעלת בעל |
| SPויבא אלהים אל אבימלך בחלום הלילה ויאמר לו הנך מת על אדות האשׁה אשׁר לקחת והיא בעילת בעל | |
| 4 | MTואבימלך לא קרב אליה ויאמר אדני הגוי גם צדיק תהרג |
| SPואבימלך לא קרב אליה ויאמר אדני הגוי גם צדיק תהרג | |
| 5 | MTהלא הוא אמר לי אחתי הוא והיא גם הוא אמרה אחי הוא בתם לבבי ובנקין כפי עשׂיתי זאת |
| SPהלוא הוא אמר לי אחותי היא והיא גם אמרה אחי הוא בתם לבבי ובנקיון כפי עשׂיתי זאת | |
| 6 | MTויאמר אליו האלהים בחלם גם אנכי ידעתי כי בתם לבבך עשׂית זאת ואחשׂך גם אנכי אותך מחטו לי על כן לא נתתיך לנגע אליה |
| SPויאמר אליו האלהים בחלום גם אנכי ידעתי כי בתם לבבך עשׂית זאת ואחשׂך גם אנכי אתך מחטאה לי על כן לא נתתיך לנגע אליה | |
| 7 | MTועתה השׁב אשׁת האישׁ כי נביא הוא ויתפלל בעדך וחיה ואם אינך משׁיב דע כי מות תמות אתה וכל אשׁר לך |
| SPועתה השׁב את אשׁת האישׁ כי נביא הוא ויתפלל בעדך וחיה ואם אינך משׁיב דע כי מות תמות אתה וכל אשׁר לך | |
| 8 | MTוישׁכם אבימלך בבקר ויקרא לכל עבדיו וידבר את כל הדברים האלה באזניהם וייראו האנשׁים מאד |
| SPוישׁכם אבימלך בבקר ויקרא לכל עבדיו וידבר את כל הדברים האלה באזניהם וייראו כל האנשׁים מאד | |
| 9 | MTויקרא אבימלך לאברהם ויאמר לו מה עשׂית לנו ומה חטאתי לך כי הבאת עלי ועל ממלכתי חטאה גדלה מעשׂים אשׁר לא יעשׂו עשׂית עמדי |
| SPויקרא אבימלך לאברהם ויאמר לו מה עשׂית לנו ומה חטאתי לך כי הבאת עלי ועל ממלכתי חטאה גדלה מעשׂים אשׁר לא יעשׂון עשׂית עמדי | |
| 10 | MTויאמר אבימלך אל אברהם מה ראית כי עשׂית את הדבר הזה |
| SPויאמר אבימלך אל אברהם מה ראית כי עשׂית את הדבר הזה | |
| 11 | MTויאמר אברהם כי אמרתי רק אין יראת אלהים במקום הזה והרגוני על דבר אשׁתי |
| SPויאמר אברהם כי יראתי כי אמרתי רק אין יראת אלהים במקום הזה והרגוני על דבר אשׁתי | |
| 12 | MTוגם אמנה אחתי בת אבי הוא אך לא בת אמי ותהי לי לאשׁה |
| SPוגם האמנם אחותי היא בת אבי אך לא בת אמי ותהי לי לאשׁה | |
| 13 | MTויהי כאשׁר התעו אתי אלהים מבית אבי ואמר לה זה חסדך אשׁר תעשׂי עמדי אל כל המקום אשׁר נבוא שׁמה אמרי לי אחי הוא |
| SPויהי כאשׁר התעה אתי אלהים מבית אבי ומארץ מולדתי ואמר לה זה חסדיך אשׁר תעשׂין עמדי אל כל המקום אשׁר נבוא שׁמה אמרי לי אחי הוא | |
| 14 | MTויקח אבימלך צאן ובקר ועבדים ושׁפחת ויתן לאברהם וישׁב לו את שׂרה אשׁתו |
| SPויקח אבימלך אלף כסף וצאן ובקר ועבדים ושׁפחות ויתן לאברהם וישׁב לו את שׂרה אשׁתו | |
| 15 | MTויאמר אבימלך הנה ארצי לפניך בטוב בעיניך שׁב |
| SPויאמר אבימלך הנה ארצי לפניך בטוב בעיניך שׁב | |
| 16 | MTולשׂרה אמר הנה נתתי אלף כסף לאחיך הנה הוא לך כסות עינים לכל אשׁר אתך ואת כל ונכחת |
| SPולשׂרה אמר הנה נתתי אלף כסף לאחיך הנה הוא ליך כסות עינים ולכל אשׁר אתיך ואת הכל ונוכחת | |
| 17 | MTויתפלל אברהם אל האלהים וירפא אלהים את אבימלך ואת אשׁתו ואמהתיו וילדו |
| SPויתפלל אברהם אל האלהים וירפא אלהים את אבימלך ואת אשׁתו ואמתיו וילדו | |
| 18 | MTכי עצר עצר יהוה בעד כל רחם לבית אבימלך על דבר שׂרה אשׁת אברהם |
| SPכי עצר עצר אלהים בעד כל רחם לבית אבימלך על דבר שׂרה אשׁת אברהם |