| 1 | MTויכלו השׁמים והארץ וכל צבאם |
| SPויכלו השׁמים והארץ וכל צבאם | |
| 2 | MTויכל אלהים ביום השׁביעי מלאכתו אשׁר עשׂה וישׁבת ביום השׁביעי מכל מלאכתו אשׁר עשׂה |
| SPויכל אלהים ביום השׁשׁי מלאכתו אשׁר עשׂה וישׁבת ביום השׁביעי מכל מלאכתו אשׁר עשׂה | |
| 3 | MTויברך אלהים את יום השׁביעי ויקדשׁ אתו כי בו שׁבת מכל מלאכתו אשׁר ברא אלהים לעשׂות |
| SPויברך אלהים את יום השׁביעי ויקדשׁ אתו כי בו שׁבת מכל מלאכתו אשׁר ברא אלהים לעשׂות | |
| 4 | MTאלה תולדות השׁמים והארץ בהבראם ביום עשׂות יהוה אלהים ארץ ושׁמים |
| SPאלה תולדת השׁמים והארץ בהבראם ביום עשׂות יהוה אלהים שׁמים וארץ | |
| 5 | MTוכל שׂיח השׂדה טרם יהיה בארץ וכל עשׂב השׂדה טרם יצמח כי לא המטיר יהוה אלהים על הארץ ואדם אין לעבד את האדמה |
| SPוכל שׂיח השׂדה טרם יהיה בארץ וכל עשׂב השׂדה טרם יצמח כי לא המטיר יהוה אלהים על הארץ ואדם אין לעבד את האדמה | |
| 6 | MTואד יעלה מן הארץ והשׁקה את כל פני האדמה |
| SPואד יעלה מן הארץ והשׁקה את כל פני האדמה | |
| 7 | MTוייצר יהוה אלהים את האדם עפר מן האדמה ויפח באפיו נשׁמת חיים ויהי האדם לנפשׁ חיה |
| SPויצר יהוה אלהים את האדם עפר מן האדמה ויפח באפיו נשׁמת חיים ויהי אדם לנפשׁ חיה | |
| 8 | MTויטע יהוה אלהים גן בעדן מקדם וישׂם שׁם את האדם אשׁר יצר |
| SPויטע יהוה אלהים גן בעדן מקדם וישׂם שׁם את האדם אשׁר יצר | |
| 9 | MTויצמח יהוה אלהים מן האדמה כל עץ נחמד למראה וטוב למאכל ועץ החיים בתוך הגן ועץ הדעת טוב ורע |
| SPויצמח יהוה אלהים מן האדמה את כל עץ נחמד למראה וטוב למאכל ועץ החיים בתוך הגן ועץ הדעת טוב ורע | |
| 10 | MTונהר יצא מעדן להשׁקות את הגן ומשׁם יפרד והיה לארבעה ראשׁים |
| SPונהר יצא מעדן להשׁקות את הגן ומשׁם יפרד והיה לארבעה ראשׁים | |
| 11 | MTשׁם האחד פישׁון הוא הסבב את כל ארץ החוילה אשׁר שׁם הזהב |
| SPשׁם האחד פישׁון הוא הסובב את כל ארץ החוילה אשׁר שׁם הזהב | |
| 12 | MTוזהב הארץ ההוא טוב שׁם הבדלח ואבן השׁהם |
| SPוזהב הארץ ההיא טוב מאד שׁם הבדלח ואבן השׁהם | |
| 13 | MTושׁם הנהר השׁני גיחון הוא הסובב את כל ארץ כושׁ |
| SPושׁם הנהר השׁני גיחון הוא הסובב את כל ארץ כושׁ | |
| 14 | MTושׁם הנהר השׁלישׁי חדקל הוא ההלך קדמת אשׁור והנהר הרביעי הוא פרת |
| SPושׁם הנהר השׁלישׁי הדקל הוא ההלך קדמת אשׁור והנהר הרביעי הוא פרת | |
| 15 | MTויקח יהוה אלהים את האדם וינחהו בגן עדן לעבדה ולשׁמרה |
| SPויקח יהוה אלהים את האדם ויניחהו בגן עדן לעבדה ולשׁמרה | |
| 16 | MTויצו יהוה אלהים על האדם לאמר מכל עץ הגן אכל תאכל |
| SPויצו יהוה אלהים על האדם לאמר מכל עץ הגן אכל תאכל | |
| 17 | MTומעץ הדעת טוב ורע לא תאכל ממנו כי ביום אכלך ממנו מות תמות |
| SPומעץ הדעת טוב ורע לא תאכל ממנו כי ביום אכלך ממנו מות תמות | |
| 18 | MTויאמר יהוה אלהים לא טוב היות האדם לבדו אעשׂה לו עזר כנגדו |
| SPויאמר יהוה אלהים לא טוב היות האדם לבדו אעשׂה לו עזר כנגדו | |
| 19 | MTויצר יהוה אלהים מן האדמה כל חית השׂדה ואת כל עוף השׁמים ויבא אל האדם לראות מה יקרא לו וכל אשׁר יקרא לו האדם נפשׁ חיה הוא שׁמו |
| SPויצר יהוה אלהים עוד מן האדמה את כל חית השׂדה ואת כל עוף השׁמים ויבא אל האדם לראות מה יקרא לו וכל אשׁר יקרא לו האדם נפשׁ חיה הוא שׁמו | |
| 20 | MTויקרא האדם שׁמות לכל הבהמה ולעוף השׁמים ולכל חית השׂדה ולאדם לא מצא עזר כנגדו |
| SPויקרא האדם שׁמות לכל הבהמה ולעוף השׁמים ולכל חית השׂדה ולאדם לא מצא עזר כנגדו | |
| 21 | MTויפל יהוה אלהים תרדמה על האדם ויישׁן ויקח אחת מצלעתיו ויסגר בשׂר תחתנה |
| SPויפל יהוה אלהים תרדמה על האדם ויישׁן ויקח אחת מצלעתיו ויסגר בשׂר תחתיה | |
| 22 | MTויבן יהוה אלהים את הצלע אשׁר לקח מן האדם לאשׁה ויבאה אל האדם |
| SPויבן יהוה אלהים את הצלע אשׁר לקח מן האדם לאשׁה ויביאה אל האדם | |
| 23 | MTויאמר האדם זאת הפעם עצם מעצמי ובשׂר מבשׂרי לזאת יקרא אשׁה כי מאישׁ לקחה זאת |
| SPויאמר האדם זאת הפעם עצם מעצמי ובשׂר מבשׂרי לזאת יקרא אשׁה כי מאישׁה לקחה זאת | |
| 24 | MTעל כן יעזב אישׁ את אביו ואת אמו ודבק באשׁתו והיו לבשׂר אחד |
| SPעל כן יעזב אישׁ את אביו ואת אמו ודבק באשׁתו והיה משׁניהם לבשׂר אחד | |
| 25 | MTויהיו שׁניהם ערומים האדם ואשׁתו ולא יתבשׁשׁו |
| SPויהיו שׁניהם ערמים אדם ואשׁתו ולא יתבשׁשׁו |