| 1 | MTוידבר אלהים את כל הדברים האלה לאמר |
| SPוידבר אלהים את כל הדברים האלה לאמר | |
| 2 | MTאנכי יהוה אלהיך אשׁר הוצאתיך מארץ מצרים מבית עבדים |
| SPאנכי יהוה אלהיך אשׁר הוצאתיך מארץ מצרים מבית עבדים | |
| 3 | MTלא יהיה לך אלהים אחרים על פני |
| SPלא יהיה לך אלהים אחרים על פני | |
| 4 | MTלא תעשׂה לך פסל וכל תמונה אשׁר בשׁמים ממעל ואשׁר בארץ מתחת ואשׁר במים מתחת לארץ |
| SPלא תעשׂה לך פסל וכל תמונה אשׁר בשׁמים ממעל ואשׁר בארץ מתחת ואשׁר במים מתחת לארץ | |
| 5 | MTלא תשׁתחוה להם ולא תעבדם כי אנכי יהוה אלהיך אל קנא פקד עון אבת על בנים על שׁלשׁים ועל רבעים לשׂנאי |
| SPלא תשׁתחוה להם ולא תעבדם כי אנכי יהוה אלהיך אל קנא פקד עון אבות על בנים על שׁלישׁים ועל רביעים לשׂנאי | |
| 6 | MTועשׂה חסד לאלפים לאהבי ולשׁמרי מצותי |
| SPועשׂה חסד לאלפים לאהבי ולשׁמרי מצותי | |
| 7 | MTלא תשׂא את שׁם יהוה אלהיך לשׁוא כי לא ינקה יהוה את אשׁר ישׂא את שׁמו לשׁוא |
| SPלא תשׂא את שׁם יהוה אלהיך לשׁוא כי לא ינקה יהוה את אשׁר ישׂא את שׁמו לשׁוא | |
| 8 | MTזכור את יום השׁבת לקדשׁו |
| SPשׁמור את יום השׁבת לקדשׁהו | |
| 9 | MTשׁשׁת ימים תעבד ועשׂית כל מלאכתך |
| SPשׁשׁת ימים תעבד ועשׂית כל מלאכתך | |
| 10 | MTויום השׁביעי שׁבת ליהוה אלהיך לא תעשׂה כל מלאכה אתה ובנך ובתך עבדך ואמתך ובהמתך וגרך אשׁר בשׁעריך |
| SPויום השׁביעי שׁבת ליהוה אלהיך לא תעשׂה בו כל מלאכה אתה ובנך ובתך עבדך ואמתך בהמתך וגרך אשׁר בשׁעריך | |
| 11 | MTכי שׁשׁת ימים עשׂה יהוה את השׁמים ואת הארץ את הים ואת כל אשׁר בם וינח ביום השׁביעי על כן ברך יהוה את יום השׁבת ויקדשׁהו |
| SPכי שׁשׁת ימים עשׂה יהוה את השׁמים ואת הארץ את הים ואת כל אשׁר בם וינח ביום השׁביעי על כן ברך יהוה את יום השׁבת ויקדשׁהו | |
| 12 | MTכבד את אביך ואת אמך למען יארכון ימיך על האדמה אשׁר יהוה אלהיך נתן לך |
| SPכבד את אביך ואת אמך למען יארכון ימיך על האדמה אשׁר יהוה אלהיך נתן לך | |
| 13 | MTלא תרצח |
| SPלא תרצח | |
| 14 | MTלא תנאף |
| SPלא תנאף | |
| 15 | MTלא תגנב |
| SPלא תגנב | |
| 16 | MTלא תענה ברעך עד שׁקר |
| SPלא תענה ברעך עד שׁקר | |
| 17 | MTלא תחמד בית רעך לא תחמד אשׁת רעך ועבדו ואמתו ושׁורו וחמרו וכל אשׁר לרעך |
| SPלא תחמד בית רעך ולא תחמד אשׁת רעך שׂדהו עבדו ואמתו שׁורו וחמורו וכל אשׁר לרעך והיה כי יביאך יהוה אלהיך אל ארץ הכנעני אשׁר אתה בא שׁמה לרשׁתה והקמת לך אבנים גדלות ושׂדת אתם בשׂיד וכתבת על האבנים את כל דברי התורה הזאת והיה בעברכם את הירדן תקימו את האבנים האלה אשׁר אנכי מצוה אתכם היום בהרגריזים ובנית שׁם מזבח ליהוה אלהיך מזבח אבנים לא תניף עליהם ברזל אבנים שׁלמות תבנה את מזבח יהוה אלהיך והעלית עליו עלות ליהוה אלהיך וזבחת שׁלמים ואכלת שׁם ושׂמחת לפני יהוה אלהיך ההר ההוא בעבר הירדן אחרי דרך מבוא השׁמשׁ בארץ הכנעני הישׁב בערבה מול הגלגל אצל אלון מורא מול שׁכם | |
| 18 | MTוכל העם ראים את הקולת ואת הלפידם ואת קול השׁפר ואת ההר עשׁן וירא העם וינעו ויעמדו מרחק |
| SPוכל העם שׁמע את הקולות ואת קול השׁופר וראים את הלפידים ואת ההר עשׁן ויראו כל העם וינעו ויעמדו מרחק | |
| 19 | MTויאמרו אל משׁה דבר אתה עמנו ונשׁמעה ואל ידבר עמנו אלהים פן נמות |
| SPויאמרו אל משׁה הן הראנו יהוה אלהינו את כבודו ואת גדלו ואת קולו שׁמענו מתוך האשׁ היום הזה ראינו כי ידבר אלהים את האדם וחי ועתה למה נמות כי תאכלנו האשׁ הגדלה הזאת אם יספים אנחנו לשׁמע את קול יהוה אלהינו עוד ומתנו כי מי כל בשׂר אשׁר שׁמע קול אלהים חיים מדבר מתוך האשׁ כמונו וחי קרב אתה ושׁמע את כל אשׁר יאמר יהוה אלהינו ואתה תדבר אלינו את כל אשׁר ידבר יהוה אלהינו אליך ושׁמענו ועשׂינו ואל ידבר עמנו האלהים פן נמות | |
| 20 | MTויאמר משׁה אל העם אל תיראו כי לבעבור נסות אתכם בא האלהים ובעבור תהיה יראתו על פניכם לבלתי תחטאו |
| SPויאמר משׁה אל העם אל תיראו כי לבעבור נסות אתכם בא האלהים ובעבור תהיה יראתו על פניכם לבלתי תחטאו | |
| 21 | MTויעמד העם מרחק ומשׁה נגשׁ אל הערפל אשׁר שׁם האלהים |
| SPויעמד העם מרחק ומשׁה נגשׁ אל הערפל אשׁר שׁם האלהים וידבר יהוה אל משׁה לאמר שׁמעתי את קול דברי העם הזה אשׁר דברו אליך הטיבו כל אשׁר דברו מי יתן והיה לבבם זה להם ליראה אתי ולשׁמר את מצותי כל הימים למען ייטב להם ולבניהם לעולם נביא אקים להם מקרב אחיהם כמוך ונתתי דברי בפיו ודבר אליהם את כל אשׁר אצונו והיה האישׁ אשׁר לא ישׁמע אל דבריו אשׁר ידבר בשׁמי אנכי אדרשׁ מעמו אך הנביא אשׁר יזיד לדבר דבר בשׁמי את אשׁר לא צויתיו לדבר ואשׁר ידבר בשׁם אלהים אחרים ומת הנביא ההוא וכי תאמר בלבבך איך נודע את הדבר אשׁר לא דברו יהוה אשׁר ידבר הנביא בשׁם יהוה לא יהיה הדבר ולא יבוא הוא הדבר אשׁר לא דברו יהוה בזדון דברו הנביא לא תגור ממנו לך אמר להם שׁובו לכם לאהליכם ואתה פה עמד עמדי ואדברה אליך את כל המצוה החקים והמשׁפטים אשׁר תלמדם ועשׂו בארץ אשׁר אנכי נתן להם לרשׁתה | |
| 22 | MTויאמר יהוה אל משׁה כה תאמר אל בני ישׂראל אתם ראיתם כי מן השׁמים דברתי עמכם |
| SPוידבר יהוה אל משׁה לאמר דבר אל בני ישׂראל אתם ראיתם כי מן השׁמים דברתי עמכם | |
| 23 | MTלא תעשׂון אתי אלהי כסף ואלהי זהב לא תעשׂו לכם |
| SPלא תעשׂו אתי אלהי כסף ואלהי זהב לא תעשׂו לכם | |
| 24 | MTמזבח אדמה תעשׂה לי וזבחת עליו את עלתיך ואת שׁלמיך את צאנך ואת בקרך בכל המקום אשׁר אזכיר את שׁמי אבוא אליך וברכתיך |
| SPמזבח אדמה תעשׂה לי וזבחת עליו את עלתיך ואת שׁלמיך מצאנך ומבקרך ובמקום אשׁר אזכרתי את שׁמי שׁמה אבוא אליך וברכתיך | |
| 25 | MTואם מזבח אבנים תעשׂה לי לא תבנה אתהן גזית כי חרבך הנפת עליה ותחללה |
| SPואם מזבח אבנים תעשׂה לי לא תבנה אתהן גזית כי חרבך הנפת עליו ותחללהו | |
| 26 | MTולא תעלה במעלת על מזבחי אשׁר לא תגלה ערותך עליו |
| SPולא תעלה במעלות על מזבחי אשׁר לא תגלה ערותך אליו |