| 1 | MTוישׁמע יתרו כהן מדין חתן משׁה את כל אשׁר עשׂה אלהים למשׁה ולישׂראל עמו כי הוציא יהוה את ישׂראל ממצרים |
| SPוישׁמע יתרו כהן מדין חתן משׁה את כל אשׁר עשׂה אלהים למשׁה ולישׂראל עמו כי הוציא יהוה את ישׂראל ממצרים | |
| 2 | MTויקח יתרו חתן משׁה את צפרה אשׁת משׁה אחר שׁלוחיה |
| SPויקח יתרו חתן משׁה את צפורה אשׁת משׁה אחר שׁלחיה | |
| 3 | MTואת שׁני בניה אשׁר שׁם האחד גרשׁם כי אמר גר הייתי בארץ נכריה |
| SPואת שׁני בניה אשׁר שׁם האחד גרשׁם כי אמר גר הייתי בארץ נכריה | |
| 4 | MTושׁם האחד אליעזר כי אלהי אבי בעזרי ויצלני מחרב פרעה |
| SPושׁם האחד אליעזר כי אלהי אבי בעזרי ויצלני מחרב פרעה | |
| 5 | MTויבא יתרו חתן משׁה ובניו ואשׁתו אל משׁה אל המדבר אשׁר הוא חנה שׁם הר האלהים |
| SPויבא יתרו חתן משׁה ובניו ואשׁתו אל משׁה אל המדבר אשׁר הוא חנה שׁם הר האלהים | |
| 6 | MTויאמר אל משׁה אני חתנך יתרו בא אליך ואשׁתך ושׁני בניה עמה |
| SPויאמר למשׁה הנה חתנך יתרו בא אליך ואשׁתך ושׁני בניה עמה | |
| 7 | MTויצא משׁה לקראת חתנו וישׁתחו וישׁק לו וישׁאלו אישׁ לרעהו לשׁלום ויבאו האהלה |
| SPויצא משׁה לקראת חתנו וישׁתחוי למשׁה וישׁק לו וישׁאלו אישׁ לרעהו לשׁלום ויבאהו האהלה | |
| 8 | MTויספר משׁה לחתנו את כל אשׁר עשׂה יהוה לפרעה ולמצרים על אודת ישׂראל את כל התלאה אשׁר מצאתם בדרך ויצלם יהוה |
| SPויספר משׁה לחתנו את כל אשׁר עשׂה יהוה לפרעה ולמצרים על אדות ישׂראל את כל התלאה אשׁר מצאתם בדרך ויצלם יהוה | |
| 9 | MTויחד יתרו על כל הטובה אשׁר עשׂה יהוה לישׂראל אשׁר הצילו מיד מצרים |
| SPויחד יתרו על כל הטובה אשׁר עשׂה יהוה לישׂראל אשׁר הצילו מיד מצרים | |
| 10 | MTויאמר יתרו ברוך יהוה אשׁר הציל אתכם מיד מצרים ומיד פרעה אשׁר הציל את העם מתחת יד מצרים |
| SPויאמר יתרו ברוך יהוה אשׁר הציל אתכם מיד מצרים ומיד פרעה אשׁר הציל את העם מתחת יד מצרים | |
| 11 | MTעתה ידעתי כי גדול יהוה מכל האלהים כי בדבר אשׁר זדו עליהם |
| SPעתה ידעתי כי גדול יהוה מכל האלהים כי בדבר אשׁר זדו עליהם | |
| 12 | MTויקח יתרו חתן משׁה עלה וזבחים לאלהים ויבא אהרן וכל זקני ישׂראל לאכל לחם עם חתן משׁה לפני האלהים |
| SPויקח יתרו חתן משׁה עלה וזבחים לאלהים ויבא אהרן ומזקני ישׂראל לאכל לחם עם חתן משׁה לפני האלהים | |
| 13 | MTויהי ממחרת וישׁב משׁה לשׁפט את העם ויעמד העם על משׁה מן הבקר עד הערב |
| SPויהי ממחרת וישׁב משׁה לשׁפט את העם ויעמד העם על משׁה מן הבקר ועד הערב | |
| 14 | MTוירא חתן משׁה את כל אשׁר הוא עשׂה לעם ויאמר מה הדבר הזה אשׁר אתה עשׂה לעם מדוע אתה יושׁב לבדך וכל העם נצב עליך מן בקר עד ערב |
| SPוירא חתן משׁה את כל אשׁר הוא עשׂה לעם ויאמר מה הדבר הזה אשׁר אתה עשׂה לעם מדוע אתה ישׁב לבדך וכל העם נצב עליך מן הבקר ועד הערב | |
| 15 | MTויאמר משׁה לחתנו כי יבא אלי העם לדרשׁ אלהים |
| SPויאמר משׁה לחתנו כי יבוא אלי העם לדרשׁ אלהים | |
| 16 | MTכי יהיה להם דבר בא אלי ושׁפטתי בין אישׁ ובין רעהו והודעתי את חקי האלהים ואת תורתיו |
| SPכי יהיה להם דבר בא אלי ושׁפטתי בין אישׁ ובין רעהו והודעתיו את חקי האלהים ואת תורותיו | |
| 17 | MTויאמר חתן משׁה אליו לא טוב הדבר אשׁר אתה עשׂה |
| SPויאמר חתן משׁה אליו לא טוב הדבר אשׁר אתה עשׂה | |
| 18 | MTנבל תבל גם אתה גם העם הזה אשׁר עמך כי כבד ממך הדבר לא תוכל עשׂהו לבדך |
| SPנבל תבל גם אתה גם העם הזה אשׁר עמך כי כבד ממך הדבר לא תוכל עשׂותו לבדך | |
| 19 | MTעתה שׁמע בקלי איעצך ויהי אלהים עמך היה אתה לעם מול האלהים והבאת אתה את הדברים אל האלהים |
| SPעתה שׁמע בקולי אעיצך ויהי אלהים עמך הוי אתה לעם מול האלהים והבאת אתה את הדברים אל האלהים | |
| 20 | MTוהזהרתה אתהם את החקים ואת התורת והודעת להם את הדרך ילכו בה ואת המעשׂה אשׁר יעשׂון |
| SPוהזהרת אתם את החקים ואת התורה והודעת להם את הדרך אשׁר ילכו בה ואת המעשׂה אשׁר יעשׂון | |
| 21 | MTואתה תחזה מכל העם אנשׁי חיל יראי אלהים אנשׁי אמת שׂנאי בצע ושׂמת עלהם שׂרי אלפים שׂרי מאות שׂרי חמשׁים ושׂרי עשׂרת |
| SPואתה תחזה לך מכל העם אנשׁי חיל יראי אלהים אנשׁי אמת שׂנאי בצע ושׂמת עליהם שׂרי אלפים ושׂרי מאות שׂרי חמשׁים ושׂרי עשׂרות | |
| 22 | MTושׁפטו את העם בכל עת והיה כל הדבר הגדל יביאו אליך וכל הדבר הקטן ישׁפטו הם והקל מעליך ונשׂאו אתך |
| SPושׁפטו את העם בכל עת והיה כל הדבר הגדול יביאון אליך וכל הדבר הקטן ישׁפטו הם והקל מעליך ונשׂאו אתך | |
| 23 | MTאם את הדבר הזה תעשׂה וצוך אלהים ויכלת עמד וגם כל העם הזה על מקמו יבא בשׁלום |
| SPאם את הדבר הזה תעשׂה וצוך אלהים ויכלת עמד וגם כל העם הזה אל מקומו יבוא בשׁלום | |
| 24 | MTוישׁמע משׁה לקול חתנו ויעשׂ כל אשׁר אמר |
| SPוישׁמע משׁה לקול חתנו ויעשׂ כל אשׁר אמר ויאמר משׁה אל העם לא אוכל אנכי לבדי שׂאת אתכם יהוה אלהיכם הרבה אתכם והנכם היום ככוכבי השׁמים לרב יהוה אלהי אבתיכם יסף עליכם ככם אלף פעמים ויברך אתכם כאשׁר דבר לכם איך אשׂא לבדי טרחכם משׂאכם וריבכם הבו לכם אנשׁים חכמים ונבונים וידעים לשׁבטיכם ואשׂימם בראשׁיכם ויענו ויאמרו טוב הדבר אשׁר דברת לעשׂות ויקח את ראשׁי שׁבטיהם אנשׁים חכמים וידעים | |
| 25 | MTויבחר משׁה אנשׁי חיל מכל ישׂראל ויתן אתם ראשׁים על העם שׂרי אלפים שׂרי מאות שׂרי חמשׁים ושׂרי עשׂרת |
| SPויתן אתם ראשׁים עליהם שׂרי אלפים ושׂרי מאות שׂרי חמשׁים ושׂרי עשׂרות ושׁטרים לשׁבטיהם ויצו את שׁפטיהם לאמר שׁמעו בין אחיכם ושׁפטתם צדק בין אישׁ ובין אחיו ובין גרו לא תכירו פנים במשׁפט כקטן כגדול תשׁמעון לא תגורו מפני אישׁ כי המשׁפט לאלהים הוא והדבר אשׁר יקשׁה מכם תקריבון אלי ושׁמעתיו ויצו אתם את כל הדברים אשׁר יעשׂון | |
| 26 | MTושׁפטו את העם בכל עת את הדבר הקשׁה יביאון אל משׁה וכל הדבר הקטן ישׁפוטו הם |
| SPוישׁפטו את העם בכל עת את הדבר הגדול יביאון אל משׁה וכל הדבר הקטן ישׁפטו הם | |
| 27 | MTוישׁלח משׁה את חתנו וילך לו אל ארצו |
| SPוישׁלח משׁה את חתנו וילך לו אל ארצו |