| 1 | MTויסעו מאילם ויבאו כל עדת בני ישׂראל אל מדבר סין אשׁר בין אילם ובין סיני בחמשׁה עשׂר יום לחדשׁ השׁני לצאתם מארץ מצרים |
| SPויסעו מאילים ויבאו כל עדת בני ישׂראל אל מדבר סין אשׁר בין אילים ובין סיני בחמשׁה עשׂר יום לחדשׁ השׁני לצאתם מארץ מצרים | |
| 2 | MTוילינו כל עדת בני ישׂראל על משׁה ועל אהרן במדבר |
| SPוילנו כל עדת בני ישׂראל על משׁה ועל אהרן במדבר | |
| 3 | MTויאמרו אלהם בני ישׂראל מי יתן מותנו ביד יהוה בארץ מצרים בשׁבתנו על סיר הבשׂר באכלנו לחם לשׂבע כי הוצאתם אתנו אל המדבר הזה להמית את כל הקהל הזה ברעב |
| SPויאמרו אליהם בני ישׂראל מי יתן מותנו ביד יהוה בארץ מצרים בשׁבתנו על סיר הבשׂר באכלנו לחם לשׁבע כי הוצאתם אתנו אל המדבר הזה להמית את כל הקהל הזה ברעב | |
| 4 | MTויאמר יהוה אל משׁה הנני ממטיר לכם לחם מן השׁמים ויצא העם ולקטו דבר יום ביומו למען אנסנו הילך בתורתי אם לא |
| SPויאמר יהוה אל משׁה הנני ממטיר לכם לחם מן השׁמים ויצא העם ולקטו דבר יום ביומו למען אנסנו הילכו בתורותי אם לא | |
| 5 | MTוהיה ביום השׁשׁי והכינו את אשׁר יביאו והיה משׁנה על אשׁר ילקטו יום יום |
| SPוהיה ביום השׁשׁי והכינו את אשׁר יביאו והיה משׁנה על אשׁר ילקטו יום ויום | |
| 6 | MTויאמר משׁה ואהרן אל כל בני ישׂראל ערב וידעתם כי יהוה הוציא אתכם מארץ מצרים |
| SPויאמר משׁה ואהרן אל כל בני ישׂראל ערב וידעתם כי יהוה הוציא אתכם מארץ מצרים | |
| 7 | MTובקר וראיתם את כבוד יהוה בשׁמעו את תלנתיכם על יהוה ונחנו מה כי תלונו עלינו |
| SPובקר וראיתם את כבוד יהוה בשׁמעו את תלנתיכם על יהוה ואנחנו מה כי תלנו עלינו | |
| 8 | MTויאמר משׁה בתת יהוה לכם בערב בשׂר לאכל ולחם בבקר לשׂבע בשׁמע יהוה את תלנתיכם אשׁר אתם מלינם עליו ונחנו מה לא עלינו תלנתיכם כי על יהוה |
| SPויאמר משׁה בתת יהוה לכם בערב בשׂר לאכל ולחם בבקר לשׁבע בשׁמע יהוה את תלנתיכם אשׁר אתם מלנים עליו ואנחנו מה לא עלינו תלנתיכם כי על יהוה | |
| 9 | MTויאמר משׁה אל אהרן אמר אל כל עדת בני ישׂראל קרבו לפני יהוה כי שׁמע את תלנתיכם |
| SPויאמר משׁה אל אהרן אמר אל כל עדת בני ישׂראל קרבו לפני יהוה כי שׁמע את תלנתיכם | |
| 10 | MTויהי כדבר אהרן אל כל עדת בני ישׂראל ויפנו אל המדבר והנה כבוד יהוה נראה בענן |
| SPויהי כדבר אהרן אל כל עדת בני ישׂראל ויפנו אל המדבר והנה כבוד יהוה נראה בענן | |
| 11 | MTוידבר יהוה אל משׁה לאמר |
| SPוידבר יהוה אל משׁה לאמר | |
| 12 | MTשׁמעתי את תלונת בני ישׂראל דבר אלהם לאמר בין הערבים תאכלו בשׂר ובבקר תשׂבעו לחם וידעתם כי אני יהוה אלהיכם |
| SPשׁמעתי את תלנות בני ישׂראל דבר אליהם לאמר בין הערבים תאכלו בשׂר ובבקר תשׂבעו לחם וידעתם כי אני יהוה אלהיכם | |
| 13 | MTויהי בערב ותעל השׂלו ותכס את המחנה ובבקר היתה שׁכבת הטל סביב למחנה |
| SPויהי בערב ותעל השׂלוי ותכס את המחנה ובבקר היתה שׁכבת הטל סביב למחנה | |
| 14 | MTותעל שׁכבת הטל והנה על פני המדבר דק מחספס דק ככפר על הארץ |
| SPותעל שׁכבת הטל והנה על פני המדבר דק מחספס דק ככופר על הארץ | |
| 15 | MTויראו בני ישׂראל ויאמרו אישׁ אל אחיו מן הוא כי לא ידעו מה הוא ויאמר משׁה אלהם הוא הלחם אשׁר נתן יהוה לכם לאכלה |
| SPויראו בני ישׂראל ויאמרו אישׁ אל אחיו מן הוא כי לא ידעו מה הוא ויאמר משׁה אליהם הוא הלחם אשׁר נתן יהוה לכם לאכלה | |
| 16 | MTזה הדבר אשׁר צוה יהוה לקטו ממנו אישׁ לפי אכלו עמר לגלגלת מספר נפשׁתיכם אישׁ לאשׁר באהלו תקחו |
| SPזה הדבר אשׁר צוה יהוה לקטו ממנו אישׁ לפי אכלו עמר לגלגלת מספר נפשׁתיכם אישׁ לאשׁר באהלו תקחו | |
| 17 | MTויעשׂו כן בני ישׂראל וילקטו המרבה והממעיט |
| SPויעשׂו כן בני ישׂראל וילקטו המרבה והממעיט | |
| 18 | MTוימדו בעמר ולא העדיף המרבה והממעיט לא החסיר אישׁ לפי אכלו לקטו |
| SPוימדו בעמר ולא העדיף המרבה והממעיט לא החסיר אישׁ לפי אכלו לקטו | |
| 19 | MTויאמר משׁה אלהם אישׁ אל יותר ממנו עד בקר |
| SPויאמר משׁה אליהם אישׁ אל יותיר ממנו עד בקר | |
| 20 | MTולא שׁמעו אל משׁה ויותרו אנשׁים ממנו עד בקר וירם תולעים ויבאשׁ ויקצף עלהם משׁה |
| SPולא שׁמעו אל משׁה ויותירו אנשׁים ממנו עד בקר וירם תולעים ויבאשׁ ויקצף עליהם משׁה | |
| 21 | MTוילקטו אתו בבקר בבקר אישׁ כפי אכלו וחם השׁמשׁ ונמס |
| SPוילקטו אתו בבקר בבקר אישׁ לפי אכלו וחמה השׁמשׁ ונמס | |
| 22 | MTויהי ביום השׁשׁי לקטו לחם משׁנה שׁני העמר לאחד ויבאו כל נשׂיאי העדה ויגידו למשׁה |
| SPויהי ביום השׁשׁי לקטו לחם משׁנה שׁני העמר לאחד ויבאו כל נשׂיאי העדה ויגדו למשׁה | |
| 23 | MTויאמר אלהם הוא אשׁר דבר יהוה שׁבתון שׁבת קדשׁ ליהוה מחר את אשׁר תאפו אפו ואת אשׁר תבשׁלו בשׁלו ואת כל העדף הניחו לכם למשׁמרת עד הבקר |
| SPויאמר אליהם הוא אשׁר דבר יהוה שׁבתון שׁבת קדשׁ ליהוה מחר את אשׁר תאפו אפו ואת אשׁר תבשׁלו בשׁלו ואת כל העדף הניחו לכם למשׁמרת עד בקר | |
| 24 | MTויניחו אתו עד הבקר כאשׁר צוה משׁה ולא הבאישׁ ורמה לא היתה בו |
| SPויניחו אתו עד הבקר כאשׁר צוה משׁה ולא הבאישׁ ורמה לא היתה בו | |
| 25 | MTויאמר משׁה אכלהו היום כי שׁבת היום ליהוה היום לא תמצאהו בשׂדה |
| SPויאמר משׁה אכלהו היום כי שׁבת היום ליהוה היום לא תמצאו בשׂדה | |
| 26 | MTשׁשׁת ימים תלקטהו וביום השׁביעי שׁבת לא יהיה בו |
| SPשׁשׁת ימים תלקטהו וביום השׁביעי שׁבת לא יהיה בו | |
| 27 | MTויהי ביום השׁביעי יצאו מן העם ללקט ולא מצאו |
| SPויהי ביום השׁביעי יצאו מן העם ללקט ולא מצאו | |
| 28 | MTויאמר יהוה אל משׁה עד אנה מאנתם לשׁמר מצותי ותורתי |
| SPויאמר יהוה אל משׁה עד הנה מאנתם לשׁמר מצותי ותורותי | |
| 29 | MTראו כי יהוה נתן לכם השׁבת על כן הוא נתן לכם ביום השׁשׁי לחם יומים שׁבו אישׁ תחתיו אל יצא אישׁ ממקמו ביום השׁביעי |
| SPראו כי יהוה נתן לכם את השׁבת על כן הוא נתן לכם ביום השׁשׁי לחם יומים שׁבו אישׁ תחתיו אל יצא אישׁ ממקומו ביום השׁבת | |
| 30 | MTוישׁבתו העם ביום השׁבעי |
| SPוישׁבת העם ביום השׁביעי | |
| 31 | MTויקראו בית ישׂראל את שׁמו מן והוא כזרע גד לבן וטעמו כצפיחת בדבשׁ |
| SPויקראו בית ישׂראל את שׁמו מן והוא כזרע גד לבן וטעמו כצפחית בדבשׁ | |
| 32 | MTויאמר משׁה זה הדבר אשׁר צוה יהוה מלא העמר ממנו למשׁמרת לדרתיכם למען יראו את הלחם אשׁר האכלתי אתכם במדבר בהוציאי אתכם מארץ מצרים |
| SPויאמר משׁה זה הדבר אשׁר צוה יהוה מלאו העמר ממנו למשׁמרת לדרתיכם למען יראו את הלחם אשׁר האכלתי אתכם במדבר בהוצאי אתכם מארץ מצרים | |
| 33 | MTויאמר משׁה אל אהרן קח צנצנת אחת ותן שׁמה מלא העמר מן והנח אתו לפני יהוה למשׁמרת לדרתיכם |
| SPויאמר משׁה אל אהרן קח צנצנת אחת ותן שׁם מלוא העמר מן והניח אתו לפני יהוה למשׁמרת לדרתיכם | |
| 34 | MTכאשׁר צוה יהוה אל משׁה ויניחהו אהרן לפני העדת למשׁמרת |
| SPכאשׁר צוה יהוה את משׁה ויניחהו אהרן לפני העדות למשׁמרת | |
| 35 | MTובני ישׂראל אכלו את המן ארבעים שׁנה עד באם אל ארץ נושׁבת את המן אכלו עד באם אל קצה ארץ כנען |
| SPובני ישׂראל אכלו את המן ארבעים שׁנה עד באם אל ארץ נושׁבת את המן אכלו עד באם אל קצה ארץ כנען | |
| 36 | MTוהעמר עשׂרית האיפה הוא |
| SPוהעמר עשׂירת האיפה הוא |