| 1 | MTאז ישׁיר משׁה ובני ישׂראל את השׁירה הזאת ליהוה ויאמרו לאמר אשׁירה ליהוה כי גאה גאה סוס ורכבו רמה בים |
| SPאז ישׁר משׁה ובני ישׂראל את השׁירה הזאת ליהוה ויאמרו לאמר אשׁירו ליהוה כי גוי גאה סוס ורכבו רמה בים | |
| 2 | MTעזי וזמרת יה ויהי לי לישׁועה זה אלי ואנוהו אלהי אבי וארממנהו |
| SPעזי וזמרתי ויהי לי לישׁועה זה אלי ואנוהו אלהי אבי וארממנהו | |
| 3 | MTיהוה אישׁ מלחמה יהוה שׁמו |
| SPיהוה גיבור במלחמה יהוה שׁמו | |
| 4 | MTמרכבת פרעה וחילו ירה בים ומבחר שׁלשׁיו טבעו בים סוף |
| SPמרכבת פרעה וחיליו ירא בים ומבחר שׁלישׁיו טבעו בים סוף | |
| 5 | MTתהמת יכסימו ירדו במצולת כמו אבן |
| SPתהומות יכסמו ירדו במצלות כמו אבן | |
| 6 | MTימינך יהוה נאדרי בכח ימינך יהוה תרעץ אויב |
| SPימינך יהוה נדארי בכח ימינך יהוה תרעץ אויב | |
| 7 | MTוברב גאונך תהרס קמיך תשׁלח חרנך יאכלמו כקשׁ |
| SPוברב גאניך תהרס קמיך תשׁלח חרונך יאכלמו כקשׁ | |
| 8 | MTוברוח אפיך נערמו מים נצבו כמו נד נזלים קפאו תהמת בלב ים |
| SPוברוח אפך נערמו מים נצבו כמו נד נזלים קפאו תהומות בלב ים | |
| 9 | MTאמר אויב ארדף אשׂיג אחלק שׁלל תמלאמו נפשׁי אריק חרבי תורישׁמו ידי |
| SPאמר אויב ארדף אשׂיג אחלק שׁלל תמלאמו נפשׁי אריק חרבי תורישׁמו ידי | |
| 10 | MTנשׁפת ברוחך כסמו ים צללו כעופרת במים אדירים |
| SPנשׁבת ברוחך כסמו ים צללו כעופרת במים אדירים | |
| 11 | MTמי כמכה באלם יהוה מי כמכה נאדר בקדשׁ נורא תהלת עשׂה פלא |
| SPמי כמוך באלים יהוה מי כמוך נדארי בקדשׁ נורא תהלת עשׂה פלאה | |
| 12 | MTנטית ימינך תבלעמו ארץ |
| SPנטית ימינך תבלעמו הארץ | |
| 13 | MTנחית בחסדך עם זו גאלת נהלת בעזך אל נוה קדשׁך |
| SPנחית בחסדך עם זה גאלת נחלת בעזך אל נוה קדשׁך | |
| 14 | MTשׁמעו עמים ירגזון חיל אחז ישׁבי פלשׁת |
| SPשׁמעו עמים וירגזו חיל אחז ישׁבי פלשׁת | |
| 15 | MTאז נבהלו אלופי אדום אילי מואב יאחזמו רעד נמגו כל ישׁבי כנען |
| SPאז נבהלו אלופי אדום אילי מואב יאחזמו רעד נמגו כל ישׁבי כנען | |
| 16 | MTתפל עליהם אימתה ופחד בגדל זרועך ידמו כאבן עד יעבר עמך יהוה עד יעבר עם זו קנית |
| SPתפל עליהם אימה ופחד ובגדול זרועך ידמאו כאבן עד יעבר עמך יהוה עד יעבר עם זה קנית | |
| 17 | MTתבאמו ותטעמו בהר נחלתך מכון לשׁבתך פעלת יהוה מקדשׁ אדני כוננו ידיך |
| SPתביאמו ותטעמו בהר נחלתך מכון לשׁבתך פעלת יהוה מקדשׁ יהוה כוננו ידך | |
| 18 | MTיהוה ימלך לעלם ועד |
| SPיהוה ימלך עולם ועוד | |
| 19 | MTכי בא סוס פרעה ברכבו ובפרשׁיו בים וישׁב יהוה עלהם את מי הים ובני ישׂראל הלכו ביבשׁה בתוך הים |
| SPכי בא סוס פרעה ברכבו ובפרשׁיו בים וישׁב יהוה עליהם את מי הים ובני ישׂראל הלכו ביבשׁה בתוך הים | |
| 20 | MTותקח מרים הנביאה אחות אהרן את התף בידה ותצאן כל הנשׁים אחריה בתפים ובמחלת |
| SPותקח מרים הנביאה אחות אהרן את התף בידה ותצאנה כל הנשׁים אחריה בתפים ובמחלות | |
| 21 | MTותען להם מרים שׁירו ליהוה כי גאה גאה סוס ורכבו רמה בים |
| SPותען להם מרים שׁירו ליהוה כי גוי גאה סוס ורכבו רמה בים | |
| 22 | MTויסע משׁה את ישׂראל מים סוף ויצאו אל מדבר שׁור וילכו שׁלשׁת ימים במדבר ולא מצאו מים |
| SPויסע משׁה את ישׂראל מים סוף ויוציאהו אל מדבר שׁור וילכו דרך שׁלשׁת ימים במדבר ולא מצאו מים | |
| 23 | MTויבאו מרתה ולא יכלו לשׁתת מים ממרה כי מרים הם על כן קרא שׁמה מרה |
| SPויבאו מרתה ולא יכלו לשׁתות מים ממרה כי מרים הם על כן קרא שׁמה מרה | |
| 24 | MTוילנו העם על משׁה לאמר מה נשׁתה |
| SPוילן העם על משׁה לאמר מה נשׁתה | |
| 25 | MTויצעק אל יהוה ויורהו יהוה עץ וישׁלך אל המים וימתקו המים שׁם שׂם לו חק ומשׁפט ושׁם נסהו |
| SPויצעק משׁה אל יהוה ויראהו יהוה עץ וישׁלך אל המים וימתקו המים שׁם שׁם לו חק ומשׁפט ושׁם נסהו | |
| 26 | MTויאמר אם שׁמוע תשׁמע לקול יהוה אלהיך והישׁר בעיניו תעשׂה והאזנת למצותיו ושׁמרת כל חקיו כל המחלה אשׁר שׂמתי במצרים לא אשׂים עליך כי אני יהוה רפאך |
| SPויאמר אם שׁמע תשׁמע לקול יהוה אלהיך והישׁר בעיניו תעשׂה והאזנת למצותיו ושׁמרת כל חקיו כל המחלה אשׁר שׂמתי במצרים לא אשׂים עליך כי אני יהוה רפאך | |
| 27 | MTויבאו אילמה ושׁם שׁתים עשׂרה עינת מים ושׁבעים תמרים ויחנו שׁם על המים |
| SPויבאו אילים ובאילים שׁתים עשׂרה עינות מים ושׁבעים תמרים ויחנו שׁם על המים |