| 1 | MTוידבר יהוה אל משׁה לאמר |
| SPוידבר יהוה אל משׁה לאמר | |
| 2 | MTדבר אל בני ישׂראל וישׁבו ויחנו לפני פי החירת בין מגדל ובין הים לפני בעל צפן נכחו תחנו על הים |
| SPדבר אל בני ישׂראל וישׁובו ויחנו לפני פי החירת בין מגדל ובין הים לפני בעל צפון נכחו תחנו על הים | |
| 3 | MTואמר פרעה לבני ישׂראל נבכים הם בארץ סגר עליהם המדבר |
| SPואמר פרעה לבני ישׂראל נבכים הם בארץ סגר עליהם המדבר | |
| 4 | MTוחזקתי את לב פרעה ורדף אחריהם ואכבדה בפרעה ובכל חילו וידעו מצרים כי אני יהוה ויעשׂו כן |
| SPוהחזקתי את לב פרעה ורדף אחריהם ואכבדה בפרעה ובכל חילו וידעו מצרים כי אני יהוה ויעשׂו כן | |
| 5 | MTויגד למלך מצרים כי ברח העם ויהפך לבב פרעה ועבדיו אל העם ויאמרו מה זאת עשׂינו כי שׁלחנו את ישׂראל מעבדנו |
| SPויגד למלך מצרים כי ברח העם ויהפך לב פרעה ועבדיו על העם ויאמרו מה זאת עשׂינו כי שׁלחנו את ישׂראל מעבדנו | |
| 6 | MTויאסר את רכבו ואת עמו לקח עמו |
| SPויאסר את רכבו ואת עמו לקח עמו | |
| 7 | MTויקח שׁשׁ מאות רכב בחור וכל רכב מצרים ושׁלשׁם על כלו |
| SPויקח שׁשׁ מאות רכב בחור וכל רכב מצרים ושׁלישׁים על כלו | |
| 8 | MTויחזק יהוה את לב פרעה מלך מצרים וירדף אחרי בני ישׂראל ובני ישׂראל יצאים ביד רמה |
| SPויחזק יהוה את לב פרעה מלך מצרים וירדף אחרי בני ישׂראל ובני ישׂראל יוצאים ביד רמה | |
| 9 | MTוירדפו מצרים אחריהם וישׂיגו אותם חנים על הים כל סוס רכב פרעה ופרשׁיו וחילו על פי החירת לפני בעל צפן |
| SPוירדפו מצרים אחריהם וישׂגו אתם חנים על הים כל סוס רכב פרעה ופרשׁיו וחילו על פי החירת לפני בעל צפון | |
| 10 | MTופרעה הקריב וישׂאו בני ישׂראל את עיניהם והנה מצרים נסע אחריהם וייראו מאד ויצעקו בני ישׂראל אל יהוה |
| SPופרעה הקריב וישׂאו בני ישׂראל את עיניהם ויראו והנה מצרים נסעים אחריהם וייראו מאד ויצעקו בני ישׂראל אל יהוה | |
| 11 | MTויאמרו אל משׁה המבלי אין קברים במצרים לקחתנו למות במדבר מה זאת עשׂית לנו להוציאנו ממצרים |
| SPויאמרו אל משׁה המבלי אין קברים במצרים לקחתנו למות במדבר מה זאת עשׂית לנו להוציאנו ממצרים | |
| 12 | MTהלא זה הדבר אשׁר דברנו אליך במצרים לאמר חדל ממנו ונעבדה את מצרים כי טוב לנו עבד את מצרים ממתנו במדבר |
| SPהלוא זה הדבר אשׁר דברנו אליך במצרים לאמר חדל נא ממנו ונעבדה את מצרים כי טוב לנו עבד את מצרים ממותנו במדבר | |
| 13 | MTויאמר משׁה אל העם אל תיראו התיצבו וראו את ישׁועת יהוה אשׁר יעשׂה לכם היום כי אשׁר ראיתם את מצרים היום לא תסיפו לראתם עוד עד עולם |
| SPויאמר משׁה אל העם אל תיראו התיצבו וראו את ישׁועת יהוה אשׁר יעשׂה לכם היום כי כאשׁר ראיתם את מצרים היום לא תוסיפון לראותם עוד עד עולם | |
| 14 | MTיהוה ילחם לכם ואתם תחרישׁון |
| SPיהוה ילחם לכם ואתם תחרישׁון | |
| 15 | MTויאמר יהוה אל משׁה מה תצעק אלי דבר אל בני ישׂראל ויסעו |
| SPויאמר יהוה אל משׁה מה תצעק אלי דבר אל בני ישׂראל ויסעו | |
| 16 | MTואתה הרם את מטך ונטה את ידך על הים ובקעהו ויבאו בני ישׂראל בתוך הים ביבשׁה |
| SPואתה הרם את מטך ונטה את ידך על הים ובקעהו ויבאו בני ישׂראל בתוך הים ביבשׁה | |
| 17 | MTואני הנני מחזק את לב מצרים ויבאו אחריהם ואכבדה בפרעה ובכל חילו ברכבו ובפרשׁיו |
| SPואני הנני מחזיק את לב מצרים ויבאו אחריהם ואכבדה בפרעה ובכל חילו ברכבו ובפרשׁיו | |
| 18 | MTוידעו מצרים כי אני יהוה בהכבדי בפרעה ברכבו ובפרשׁיו |
| SPוידעו כל מצרים כי אני יהוה בהכבדי בפרעה ובכל חילו ברכבו ובפרשׁיו | |
| 19 | MTויסע מלאך האלהים ההלך לפני מחנה ישׂראל וילך מאחריהם ויסע עמוד הענן מפניהם ויעמד מאחריהם |
| SPויסע מלאך האלהים ההלך לפני מחנה ישׂראל וילך מאחריהם ויסע עמוד הענן מפניהם ויעמד מאחריהם | |
| 20 | MTויבא בין מחנה מצרים ובין מחנה ישׂראל ויהי הענן והחשׁך ויאר את הלילה ולא קרב זה אל זה כל הלילה |
| SPויבא בין מחנה מצרים ובין מחנה ישׂראל ויהי הענן החשׁך ויאר את הלילה ולא קרב זה אל זה כל הלילה | |
| 21 | MTויט משׁה את ידו על הים ויולך יהוה את הים ברוח קדים עזה כל הלילה וישׂם את הים לחרבה ויבקעו המים |
| SPויט משׁה את ידו על הים ויולך יהוה את הים ברוח קדים עזה כל הלילה וישׂם את הים לחרבה ויבקעו המים | |
| 22 | MTויבאו בני ישׂראל בתוך הים ביבשׁה והמים להם חמה מימינם ומשׂמאלם |
| SPויבאו בני ישׂראל בתוך הים ביבשׁה והמים להם חומה מימינם ומשׂמאלם | |
| 23 | MTוירדפו מצרים ויבאו אחריהם כל סוס פרעה רכבו ופרשׁיו אל תוך הים |
| SPוירדפו מצרים ויבאו אחריהם כל סוס פרעה רכבו ופרשׁיו אל תוך הים | |
| 24 | MTויהי באשׁמרת הבקר וישׁקף יהוה אל מחנה מצרים בעמוד אשׁ וענן ויהם את מחנה מצרים |
| SPויהי באשׁמרת הבקר וישׁקף יהוה על מחנה מצרים בעמוד אשׁ וענן ויהם את מחנה מצרים | |
| 25 | MTויסר את אפן מרכבתיו וינהגהו בכבדת ויאמר מצרים אנוסה מפני ישׂראל כי יהוה נלחם להם במצרים |
| SPויאסר את אפן מרכבתיו וינהגהו בכבודות ויאמרו מצרים אנוסה מפני ישׂראל כי יהוה הנלחם להם במצרים | |
| 26 | MTויאמר יהוה אל משׁה נטה את ידך על הים וישׁבו המים על מצרים על רכבו ועל פרשׁיו |
| SPויאמר יהוה אל משׁה נטה את ידך על הים וישׁובו המים על מצרים על רכבו ועל פרשׁיו | |
| 27 | MTויט משׁה את ידו על הים וישׁב הים לפנות בקר לאיתנו ומצרים נסים לקראתו וינער יהוה את מצרים בתוך הים |
| SPויט משׁה את ידו על הים וישׁב הים לפנות הבקר לאיתנו ומצרים נסעים לקראתו וינער יהוה את מצרים תוך הים | |
| 28 | MTוישׁבו המים ויכסו את הרכב ואת הפרשׁים לכל חיל פרעה הבאים אחריהם בים לא נשׁאר בהם עד אחד |
| SPוישׁובו המים ויכסו את הרכב ואת הפרשׁים לכל חיל פרעה הבאים אחריהם בים לא נשׁאר בהם עד אחד | |
| 29 | MTובני ישׂראל הלכו ביבשׁה בתוך הים והמים להם חמה מימינם ומשׂמאלם |
| SPובני ישׂראל הלכו ביבשׁה בתוך הים והמים להם חומה מימינם ומשׂמאלם | |
| 30 | MTויושׁע יהוה ביום ההוא את ישׂראל מיד מצרים וירא ישׂראל את מצרים מת על שׂפת הים |
| SPויושׁיע יהוה ביום ההוא את ישׂראל מיד מצרים וירא ישׂראל את מצרים מת על שׂפת הים | |
| 31 | MTוירא ישׂראל את היד הגדלה אשׁר עשׂה יהוה במצרים וייראו העם את יהוה ויאמינו ביהוה ובמשׁה עבדו |
| SPוירא ישׂראל את היד הגדלה אשׁר עשׂה יהוה במצרים וייראו העם את יהוה ויאמנו ביהוה ובמשׁה עבדו |