| 1 | MTויאמר יהוה אל משׁה ואל אהרן בארץ מצרים לאמר |
| SPויאמר יהוה אל משׁה ואל אהרן בארץ מצרים לאמר | |
| 2 | MTהחדשׁ הזה לכם ראשׁ חדשׁים ראשׁון הוא לכם לחדשׁי השׁנה |
| SPהחדשׁ הזה לכם ראשׁ החדשׁים ראישׁון הוא לכם לחדשׁי השׁנה | |
| 3 | MTדברו אל כל עדת ישׂראל לאמר בעשׂר לחדשׁ הזה ויקחו להם אישׁ שׂה לבית אבת שׂה לבית |
| SPדברו נא אל כל עדת בני ישׂראל לאמר בעשׂור לחדשׁ הזה ויקחו להם אישׁ שׂה לבית אבות שׂה לבית | |
| 4 | MTואם ימעט הבית מהית משׂה ולקח הוא ושׁכנו הקרב אל ביתו במכסת נפשׁת אישׁ לפי אכלו תכסו על השׂה |
| SPואם ימעט הבית מהיות משׁה ולקח הוא ושׁכינו הקרוב אל ביתו במכסות נפשׁות אישׁ לפי אכלו תכסו על השׂה | |
| 5 | MTשׂה תמים זכר בן שׁנה יהיה לכם מן הכבשׂים ומן העזים תקחו |
| SPשׂה תמים זכר בן שׁנה יהיה לכם מן הכשׂבים ומן העזים תקחו | |
| 6 | MTוהיה לכם למשׁמרת עד ארבעה עשׂר יום לחדשׁ הזה ושׁחטו אתו כל קהל עדת ישׂראל בין הערבים |
| SPוהיה לכם למשׁמרת עד ארבעה עשׂר יום לחדשׁ הזה ושׁחטו אתו כל קהל עדת בני ישׂראל בין הערבים | |
| 7 | MTולקחו מן הדם ונתנו על שׁתי המזוזת ועל המשׁקוף על הבתים אשׁר יאכלו אתו בהם |
| SPולקחו מן הדם ונתנו על שׁתי המזזות ועל המשׁקוף על הבתים אשׁר יאכלו אתו בהם | |
| 8 | MTואכלו את הבשׂר בלילה הזה צלי אשׁ ומצות על מררים יאכלהו |
| SPואכלו את הבשׂר בלילה הזה צלי אשׁ ומצות על מררים יאכלהו | |
| 9 | MTאל תאכלו ממנו נא ובשׁל מבשׁל במים כי אם צלי אשׁ ראשׁו על כרעיו ועל קרבו |
| SPאל תאכלו ממנו נא ובשׁל מבשׁל במים כי אם צלי אשׁ ראשׁו על כרעיו ועל קרבו | |
| 10 | MTולא תותירו ממנו עד בקר והנתר ממנו עד בקר באשׁ תשׂרפו |
| SPולא תותירו ממנו עד בקר והנותר ממנו עד בקר באשׁ תשׂרפו | |
| 11 | MTוככה תאכלו אתו מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוה |
| SPוככה תאכלו אתו מתניכם חגרים נעליכם ברגליכם ומקליכם בידיכם ואכלתם אתו בחפזון פסח הוא ליהוה | |
| 12 | MTועברתי בארץ מצרים בלילה הזה והכיתי כל בכור בארץ מצרים מאדם ועד בהמה ובכל אלהי מצרים אעשׂה שׁפטים אני יהוה |
| SPועברתי בארץ מצרים בלילה הזה והכיתי כל בכור בארץ מצרים מאדם עד בהמה ובכל אלהי מצרים אעשׂה שׁפטים אני יהוה | |
| 13 | MTוהיה הדם לכם לאת על הבתים אשׁר אתם שׁם וראיתי את הדם ופסחתי עלכם ולא יהיה בכם נגף למשׁחית בהכתי בארץ מצרים |
| SPוהיה הדם לכם לאות על הבתים אשׁר אתם שׁם וראיתי את הדם ופסחתי עליכם ולא יהיה בכם נגף למשׁחית בהכותי בארץ מצרים | |
| 14 | MTוהיה היום הזה לכם לזכרון וחגתם אתו חג ליהוה לדרתיכם חקת עולם תחגהו |
| SPוהיה היום הזה לכם לזכרון וחגתם אתו חג ליהוה לדרתיכם חקת עולם תחגהו | |
| 15 | MTשׁבעת ימים מצות תאכלו אך ביום הראשׁון תשׁביתו שׂאר מבתיכם כי כל אכל חמץ ונכרתה הנפשׁ ההוא מישׂראל מיום הראשׁן עד יום השׁבעי |
| SPשׁבעת ימים מצות תאכלו אך ביום הראישׁון תשׁביתו שׂאר מבתיכם כי כל אכל חמץ ונכרתה הנפשׁ ההיא מישׂראל מיום הראישׁון ועד יום השׁביעי | |
| 16 | MTוביום הראשׁון מקרא קדשׁ וביום השׁביעי מקרא קדשׁ יהיה לכם כל מלאכה לא יעשׂה בהם אך אשׁר יאכל לכל נפשׁ הוא לבדו יעשׂה לכם |
| SPוביום הראישׁון מקרא קדשׁ וביום השׁביעי מקרא קדשׁ יהיה לכם כל מלאכה לא יעשׂה בהם אך אשׁר יאכל לכל נפשׁ הוא לבדו יעשׂה לכם | |
| 17 | MTושׁמרתם את המצות כי בעצם היום הזה הוצאתי את צבאותיכם מארץ מצרים ושׁמרתם את היום הזה לדרתיכם חקת עולם |
| SPושׁמרתם את המצוה כי בעצם היום הזה הוצאתי את צבאתיכם מארץ מצרים ושׁמרתם ועשׂיתם את היום הזה לדרתיכם חקת עולם | |
| 18 | MTבראשׁן בארבעה עשׂר יום לחדשׁ בערב תאכלו מצת עד יום האחד ועשׂרים לחדשׁ בערב |
| SPבראישׁון בארבעה עשׂר יום לחדשׁ בערב תאכלו מצות עד יום אחד ועשׂרים לחדשׁ בערב | |
| 19 | MTשׁבעת ימים שׂאר לא ימצא בבתיכם כי כל אכל מחמצת ונכרתה הנפשׁ ההוא מעדת ישׂראל בגר ובאזרח הארץ |
| SPשׁבעת ימים שׂאר לא ימצא בבתיכם כי כל אכל מחמצת ונכרתה הנפשׁ ההיא מעדת ישׂראל בגר ובאזרח הארץ | |
| 20 | MTכל מחמצת לא תאכלו בכל מושׁבתיכם תאכלו מצות |
| SPכל מחמצת לא תאכלו בכל מושׁבתיכם תאכלו מצות | |
| 21 | MTויקרא משׁה לכל זקני ישׂראל ויאמר אלהם משׁכו וקחו לכם צאן למשׁפחתיכם ושׁחטו הפסח |
| SPויקרא משׁה לכל זקני ישׂראל ויאמר אליהם משׁכו קחו לכם צאן למשׁפחותיכם ושׁחטו הפסח | |
| 22 | MTולקחתם אגדת אזוב וטבלתם בדם אשׁר בסף והגעתם אל המשׁקוף ואל שׁתי המזוזת מן הדם אשׁר בסף ואתם לא תצאו אישׁ מפתח ביתו עד בקר |
| SPולקחתם אגדת אזוב וטבלתם בדם אשׁר בסף והגעתם על המשׁקף ועל שׁתי המזזות מן הדם אשׁר בסף ואתם אל תצאו אישׁ מפתח ביתו עד בקר | |
| 23 | MTועבר יהוה לנגף את מצרים וראה את הדם על המשׁקוף ועל שׁתי המזוזת ופסח יהוה על הפתח ולא יתן המשׁחית לבא אל בתיכם לנגף |
| SPועבר יהוה לנגף את מצרים וראה את הדם על המשׁקף ועל שׁתי המזזות ופסח יהוה על הפתח ולא יתן המשׁחית לבוא אל בתיכם לנגף | |
| 24 | MTושׁמרתם את הדבר הזה לחק לך ולבניך עד עולם |
| SPושׁמרתם את הדבר הזה לחק לך ולבניך עד עולם | |
| 25 | MTוהיה כי תבאו אל הארץ אשׁר יתן יהוה לכם כאשׁר דבר ושׁמרתם את העבדה הזאת |
| SPוהיה כי תבאו אל הארץ אשׁר יתן יהוה לכם כאשׁר דבר ושׁמרתם את העבדה הזאת בחדשׁ הזה | |
| 26 | MTוהיה כי יאמרו אליכם בניכם מה העבדה הזאת לכם |
| SPוהיה כי יאמרו אליכם בניכם מה העבדה הזאת לכם | |
| 27 | MTואמרתם זבח פסח הוא ליהוה אשׁר פסח על בתי בני ישׂראל במצרים בנגפו את מצרים ואת בתינו הציל ויקד העם וישׁתחוו |
| SPואמרתם זבח פסח הוא ליהוה אשׁר פסח על בתי בני ישׂראל במצרים בנגפו את מצרים ואת בתינו הציל ויקדו העם וישׁתחוו | |
| 28 | MTוילכו ויעשׂו בני ישׂראל כאשׁר צוה יהוה את משׁה ואהרן כן עשׂו |
| SPוילכו ויעשׂו בני ישׂראל כאשׁר צוה יהוה את משׁה ואת אהרן כן עשׂו | |
| 29 | MTויהי בחצי הלילה ויהוה הכה כל בכור בארץ מצרים מבכר פרעה הישׁב על כסאו עד בכור השׁבי אשׁר בבית הבור וכל בכור בהמה |
| SPויהי בחצי הלילה ויהוה הכה כל בכור בארץ מצרים מבכור פרעה הישׁב על כסאו ועד בכור השׁבי אשׁר בבית הבור וכל בכור בהמה | |
| 30 | MTויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשׁר אין שׁם מת |
| SPויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשׁר אין שׁם מת | |
| 31 | MTויקרא למשׁה ולאהרן לילה ויאמר קומו צאו מתוך עמי גם אתם גם בני ישׂראל ולכו עבדו את יהוה כדברכם |
| SPויקרא למשׁה ולאהרן לילה ויאמר קומו צאו מתוך עמי גם אתם גם בני ישׂראל ולכו עבדו את יהוה כדבריכם | |
| 32 | MTגם צאנכם גם בקרכם קחו כאשׁר דברתם ולכו וברכתם גם אתי |
| SPגם צאנכם גם בקרכם קחו כאשׁר דברתם ולכו וברכתם גם אתי | |
| 33 | MTותחזק מצרים על העם למהר לשׁלחם מן הארץ כי אמרו כלנו מתים |
| SPותחזק מצרים על העם למהר לשׁלחם מן הארץ כי אמרו כלנו מיתים | |
| 34 | MTוישׂא העם את בצקו טרם יחמץ משׁארתם צררת בשׂמלתם על שׁכמם |
| SPוישׂא העם את בצקו טרם יחמץ משׁארתם צררות בשׂמלותם על שׁכמם | |
| 35 | MTובני ישׂראל עשׂו כדבר משׁה וישׁאלו ממצרים כלי כסף וכלי זהב ושׂמלת |
| SPובני ישׂראל עשׂו כדבר משׁה וישׁאלו ממצרים כלי כסף וכלי זהב ושׂמלות | |
| 36 | MTויהוה נתן את חן העם בעיני מצרים וישׁאלום וינצלו את מצרים |
| SPויהוה נתן את חן העם בעיני מצרים וישׁאילום וינצלו את מצרים | |
| 37 | MTויסעו בני ישׂראל מרעמסס סכתה כשׁשׁ מאות אלף רגלי הגברים לבד מטף |
| SPויסעו בני ישׂראל מרעמסס סכותה כשׁשׁ מאות אלף רגלאי הגברים לבד מטף | |
| 38 | MTוגם ערב רב עלה אתם וצאן ובקר מקנה כבד מאד |
| SPוגם ערב רב עלה אתם וצאן ובקר מקנה כבד מאד | |
| 39 | MTויאפו את הבצק אשׁר הוציאו ממצרים עגת מצות כי לא חמץ כי גרשׁו ממצרים ולא יכלו להתמהמה וגם צדה לא עשׂו להם |
| SPויאפו את הבצק אשׁר הוציאו ממצרים עגות מצות כי לא חמץ כי גרשׁום מצרים ולא יכלו להתמהמה וגם צדה לא עשׂו להם | |
| 40 | MTומושׁב בני ישׂראל אשׁר ישׁבו במצרים שׁלשׁים שׁנה וארבע מאות שׁנה |
| SPומושׁב בני ישׂראל ואבותם אשׁר ישׁבו בארץ כנען ובארץ מצרים שׁלשׁים שׁנה וארבע מאות שׁנה | |
| 41 | MTויהי מקץ שׁלשׁים שׁנה וארבע מאות שׁנה ויהי בעצם היום הזה יצאו כל צבאות יהוה מארץ מצרים |
| SPויהי מקץ שׁלשׁים שׁנה וארבע מאות שׁנה ויהי בעצם היום הזה יצאו כל צבאות יהוה מארץ מצרים | |
| 42 | MTליל שׁמרים הוא ליהוה להוציאם מארץ מצרים הוא הלילה הזה ליהוה שׁמרים לכל בני ישׂראל לדרתם |
| SPלילה שׁמרים הוא ליהוה להוציאם מארץ מצרים הוא הלילה הזה ליהוה שׁמרים לכל בני ישׂראל לדרותם | |
| 43 | MTויאמר יהוה אל משׁה ואהרן זאת חקת הפסח כל בן נכר לא יאכל בו |
| SPויאמר יהוה אל משׁה ואל אהרן זאת חקת הפסח כל בן נכר לא יאכל בו | |
| 44 | MTוכל עבד אישׁ מקנת כסף ומלתה אתו אז יאכל בו |
| SPוכל עבד אישׁ מקנת כספו ומלת אתו אז יאכל בו | |
| 45 | MTתושׁב ושׂכיר לא יאכל בו |
| SPתושׁב ושׂכיר לא יאכל בו | |
| 46 | MTבבית אחד יאכל לא תוציא מן הבית מן הבשׂר חוצה ועצם לא תשׁברו בו |
| SPבבית אחד יאכל לא תוציאו מן הבית מן הבשׂר החוצה ועצם לא תשׁברו בו | |
| 47 | MTכל עדת ישׂראל יעשׂו אתו |
| SPכל עדת ישׂראל יעשׂו אתו | |
| 48 | MTוכי יגור אתך גר ועשׂה פסח ליהוה המול לו כל זכר ואז יקרב לעשׂתו והיה כאזרח הארץ וכל ערל לא יאכל בו |
| SPוכי יגור אתכם גר ועשׂה פסח ליהוה המול לו כל זכר ואז יקרב לעשׂותו והיה כאזרח הארץ וכל ערל לא יאכל בו | |
| 49 | MTתורה אחת יהיה לאזרח ולגר הגר בתוככם |
| SPתורה אחת יהיה לאזרח ולגר הגר בתוככם | |
| 50 | MTויעשׂו כל בני ישׂראל כאשׁר צוה יהוה את משׁה ואת אהרן כן עשׂו |
| SPויעשׂו כל בני ישׂראל כאשׁר צוה יהוה את משׁה ואת אהרן כן עשׂו | |
| 51 | MTויהי בעצם היום הזה הוציא יהוה את בני ישׂראל מארץ מצרים על צבאתם |
| SPויהי בעצם היום הזה הוציא יהוה את בני ישׂראל מארץ מצרים על צבאתם |