| 1 | MTויאמר יהוה אל משׁה עוד נגע אחד אביא על פרעה ועל מצרים אחרי כן ישׁלח אתכם מזה כשׁלחו כלה גרשׁ יגרשׁ אתכם מזה |
| SPויאמר יהוה אל משׁה עוד נגע אחד אביא על פרעה ועל מצרים ואחרי כן ישׁלח אתכם מזה כשׁלחו כלה גרשׁ יגרשׁ אתכם מזה | |
| 2 | MTדבר נא באזני העם וישׁאלו אישׁ מאת רעהו ואשׁה מאת רעותה כלי כסף וכלי זהב |
| SPדברו נא באזני העם וישׁאלו אישׁ מאת רעהו ואשׁה מאת רעותה כלי כסף וכלי זהב ושׂמלות | |
| 3 | MTויתן יהוה את חן העם בעיני מצרים גם האישׁ משׁה גדול מאד בארץ מצרים בעיני עבדי פרעה ובעיני העם |
| SPונתתי את חן העם הזה בעיני מצרים והשׁאלום וכחצית הלילה אני יצא בתוך ארץ מצרים ומת כל בכור בארץ מצרים מבכור פרעה הישׁב על כסאו ועד בכור השׁפחה אשׁר אחר הרחים ועד בכור כל בהמה והיתה צעקה גדלה במצרים אשׁר כמוה לא נהיתה וכמוה לא תוסיף ולכל בני ישׂראל לא יחרץ כלב לשׁנו למאישׁ ועד בהמה למען תדע אשׁר יפלא יהוה בין מצרים ובין ישׂראל וגם האישׁ משׁה גדל מאד בארץ מצרים בעיני עבדי פרעה ובעיני העם ויאמר משׁה אל פרעה כה אמר יהוה בני בכורי ישׂראל ואמר אליך שׁלח את בני ויעבדני ותמאן לשׁלחו הנה יהוה הרג את בנך בכורך | |
| 4 | MTויאמר משׁה כה אמר יהוה כחצת הלילה אני יוצא בתוך מצרים |
| SPויאמר משׁה כה אמר יהוה כחצית הלילה אני יצא בתוך ארץ מצרים | |
| 5 | MTומת כל בכור בארץ מצרים מבכור פרעה הישׁב על כסאו עד בכור השׁפחה אשׁר אחר הרחים וכל בכור בהמה |
| SPומת כל בכור בארץ מצרים מבכור פרעה הישׁב על כסאו ועד בכור השׁפחה אשׁר אחר הרחים ועד בכור כל בהמה | |
| 6 | MTוהיתה צעקה גדלה בכל ארץ מצרים אשׁר כמהו לא נהיתה וכמהו לא תסף |
| SPוהיתה צעקה גדלה במצרים אשׁר כמוה לא נהיתה וכמוה לא תוסיף | |
| 7 | MTולכל בני ישׂראל לא יחרץ כלב לשׁנו למאישׁ ועד בהמה למען תדעון אשׁר יפלה יהוה בין מצרים ובין ישׂראל |
| SPולכל בני ישׂראל לא יחרץ כלב לשׁנו למאישׁ ועד בהמה למען תדע אשׁר יפלא יהוה בין מצרים ובין ישׂראל | |
| 8 | MTוירדו כל עבדיך אלה אלי והשׁתחוו לי לאמר צא אתה וכל העם אשׁר ברגליך ואחרי כן אצא ויצא מעם פרעה בחרי אף |
| SPוירדו כל עבדיך אלה אלי וישׁתחוו לי לאמר צא אתה וכל העם אשׁר ברגליך ואחרי כן אצא ויצא מעם פרעה בחרי אף | |
| 9 | MTויאמר יהוה אל משׁה לא ישׁמע אליכם פרעה למען רבות מופתי בארץ מצרים |
| SPויאמר יהוה אל משׁה לא ישׁמע אליכם פרעה למען רבות מופתי בארץ מצרים | |
| 10 | MTומשׁה ואהרן עשׂו את כל המפתים האלה לפני פרעה ויחזק יהוה את לב פרעה ולא שׁלח את בני ישׂראל מארצו |
| SPומשׁה ואהרן עשׂו את כל המופתים האלה לפני פרעה ויחזק יהוה את לב פרעה ולא שׁלח את בני ישׂראל מארצו |