| 1 | MTויאמר יהוה אל משׁה בא אל פרעה כי אני הכבדתי את לבו ואת לב עבדיו למען שׁתי אתתי אלה בקרבו |
| SPויאמר יהוה אל משׁה בא אל פרעה כי אני הכבדתי את לבו ואת לב עבדיו למען שׁתי אתותי אלה בקרבו | |
| 2 | MTולמען תספר באזני בנך ובן בנך את אשׁר התעללתי במצרים ואת אתתי אשׁר שׂמתי בם וידעתם כי אני יהוה |
| SPולמען תספר באזני בנך ובן בנך את אשׁר התעללתי במצרים ואת אתותי אשׁר שׂמתי בם וידעתם כי אני יהוה אלהיכם ואמרת אל פרעה כה אמר יהוה אלהי העברים עד מתי מאנת לענות מפני שׁלח את עמי ויעבדני כי אם מאן אתה לשׁלח את עמי הנני מביא מחר ארבה בגבולך וכסה את עין הארץ ולא יכל לראות את הארץ ואכל את יתר הפלטה הנשׁארת לכם מן הברד ואכל את כל עשׂב הארץ ואת כל פרי העץ הצמח לכם מן השׂדה ומלאו בתיך ובתי כל עבדיך ובתי כל מצרים אשׁר לא ראו אבתיך ואבות אבתיך מיום היותם על האדמה עד היום הזה | |
| 3 | MTויבא משׁה ואהרן אל פרעה ויאמרו אליו כה אמר יהוה אלהי העברים עד מתי מאנת לענת מפני שׁלח עמי ויעבדני |
| SPויבא משׁה ואהרן אל פרעה ויאמרו אליו כה אמר יהוה אלהי העברים עד מתי מאנת לענות מפני שׁלח את עמי ויעבדני | |
| 4 | MTכי אם מאן אתה לשׁלח את עמי הנני מביא מחר ארבה בגבלך |
| SPכי אם מאן אתה לשׁלח את עמי הנני מביא מחר ארבה בגבולך | |
| 5 | MTוכסה את עין הארץ ולא יוכל לראת את הארץ ואכל את יתר הפלטה הנשׁארת לכם מן הברד ואכל את כל העץ הצמח לכם מן השׂדה |
| SPוכסה את עין הארץ ולא יכל לראות את הארץ ואכל את יתר הפלטה הנשׁארת לכם מן הברד ואכל את כל עשׂב הארץ ואת כל פרי העץ הצמח לכם מן השׂדה | |
| 6 | MTומלאו בתיך ובתי כל עבדיך ובתי כל מצרים אשׁר לא ראו אבתיך ואבות אבתיך מיום היותם על האדמה עד היום הזה ויפן ויצא מעם פרעה |
| SPומלאו בתיך ובתי כל עבדיך ובתי כל מצרים אשׁר לא ראו אבתיך ואבות אבתיך מיום היותם על האדמה עד היום הזה ויפן ויצא מעם פרעה | |
| 7 | MTויאמרו עבדי פרעה אליו עד מתי יהיה זה לנו למוקשׁ שׁלח את האנשׁים ויעבדו את יהוה אלהיהם הטרם תדע כי אבדה מצרים |
| SPויאמרו עבדי פרעה אליו עד מתי יהיה זה לנו למוקשׁ שׁלח את האנשׁים ויעבדו את יהוה אלהיהם הטרם תדע כי אבדה מצרים | |
| 8 | MTויושׁב את משׁה ואת אהרן אל פרעה ויאמר אלהם לכו עבדו את יהוה אלהיכם מי ומי ההלכים |
| SPוישׁב את משׁה ואת אהרן אל פרעה ויאמר אליהם לכו עבדו את יהוה אלהיכם מי ומי ההלכים | |
| 9 | MTויאמר משׁה בנערינו ובזקנינו נלך בבנינו ובבנותנו בצאננו ובבקרנו נלך כי חג יהוה לנו |
| SPויאמר משׁה בנערינו ובזקנינו נלך בבנינו ובבנתינו בצאננו ובבקרנו נלך כי חג יהוה לנו | |
| 10 | MTויאמר אלהם יהי כן יהוה עמכם כאשׁר אשׁלח אתכם ואת טפכם ראו כי רעה נגד פניכם |
| SPויאמר אליהם יהיה כן יהוה עמכם כאשׁר אשׁלח אתכם ואת טפכם ראו כי רעה נגד פניכם | |
| 11 | MTלא כן לכו נא הגברים ועבדו את יהוה כי אתה אתם מבקשׁים ויגרשׁ אתם מאת פני פרעה |
| SPלכן לכו נא הגברים ועבדו את יהוה כי אתה אתם מבקשׁים ויגרשׁו אתם מאת פני פרעה | |
| 12 | MTויאמר יהוה אל משׁה נטה ידך על ארץ מצרים בארבה ויעל על ארץ מצרים ויאכל את כל עשׂב הארץ את כל אשׁר השׁאיר הברד |
| SPויאמר יהוה אל משׁה נטה את ידך על ארץ מצרים בארבה ויעל על ארץ מצרים ויאכל את כל עשׂב הארץ ואת כל פרי העץ אשׁר השׁאיר הברד | |
| 13 | MTויט משׁה את מטהו על ארץ מצרים ויהוה נהג רוח קדים בארץ כל היום ההוא וכל הלילה הבקר היה ורוח הקדים נשׂא את הארבה |
| SPויט משׁה את ידו על ארץ מצרים ויהוה נהג רוח קדים בארץ כל היום ההוא וכל הלילה הבקר היה ורוח הקדים נשׂא את הארבה | |
| 14 | MTויעל הארבה על כל ארץ מצרים וינח בכל גבול מצרים כבד מאד לפניו לא היה כן ארבה כמהו ואחריו לא יהיה כן |
| SPויעל הארבה על כל ארץ מצרים וינח בכל גבול מצרים כבד מאד לפניו לא היה כן ארבה כמהו ואחריו לא יהיה כן | |
| 15 | MTויכס את עין כל הארץ ותחשׁך הארץ ויאכל את כל עשׂב הארץ ואת כל פרי העץ אשׁר הותיר הברד ולא נותר כל ירק בעץ ובעשׂב השׂדה בכל ארץ מצרים |
| SPויכס את עין כל הארץ ותחשׁך הארץ ויאכל את כל עשׂב הארץ ואת כל פרי העץ אשׁר הותיר הברד ולא נותר כל ירק בעץ ובעשׂב השׂדה בכל ארץ מצרים | |
| 16 | MTוימהר פרעה לקרא למשׁה ולאהרן ויאמר חטאתי ליהוה אלהיכם ולכם |
| SPוימהר פרעה לקרא למשׁה ולאהרן ויאמר חטאתי ליהוה אלהיכם ולכם | |
| 17 | MTועתה שׂא נא חטאתי אך הפעם והעתירו ליהוה אלהיכם ויסר מעלי רק את המות הזה |
| SPועתה שׂאו נא חטאתי אך הפעם העתירו אל יהוה אלהיכם ויסר מעלי רק את המות הזה | |
| 18 | MTויצא מעם פרעה ויעתר אל יהוה |
| SPויצא מעם פרעה ויעתר אל יהוה | |
| 19 | MTויהפך יהוה רוח ים חזק מאד וישׂא את הארבה ויתקעהו ימה סוף לא נשׁאר ארבה אחד בכל גבול מצרים |
| SPויהפך יהוה רוח ים חזק מאד וישׂא את הארבה ויתקעהו ים סוף לא נשׁאר ארבה אחד בכל גבול מצרים | |
| 20 | MTויחזק יהוה את לב פרעה ולא שׁלח את בני ישׂראל |
| SPויחזק יהוה את לב פרעה ולא שׁלח את בני ישׂראל | |
| 21 | MTויאמר יהוה אל משׁה נטה ידך על השׁמים ויהי חשׁך על ארץ מצרים וימשׁ חשׁך |
| SPויאמר יהוה אל משׁה נטה את ידך על השׁמים ויהי חשׁך על ארץ מצרים וימשׁ החשׁך | |
| 22 | MTויט משׁה את ידו על השׁמים ויהי חשׁך אפלה בכל ארץ מצרים שׁלשׁת ימים |
| SPויט משׁה את ידו על השׁמים ויהי חשׁך אפלה בכל ארץ מצרים שׁלשׁת ימים | |
| 23 | MTלא ראו אישׁ את אחיו ולא קמו אישׁ מתחתיו שׁלשׁת ימים ולכל בני ישׂראל היה אור במושׁבתם |
| SPלא ראו אישׁ את אחיו ולא קמו אישׁ מתחתיו שׁלשׁת ימים ולכל בני ישׂראל היה אור במושׁבתם | |
| 24 | MTויקרא פרעה אל משׁה ויאמר לכו עבדו את יהוה רק צאנכם ובקרכם יצג גם טפכם ילך עמכם |
| SPויקרא פרעה למשׁה ולאהרן ויאמר לכו עבדו את יהוה רק צאנכם ובקרכם יצג גם טפכם ילך עמכם | |
| 25 | MTויאמר משׁה גם אתה תתן בידנו זבחים ועלות ועשׂינו ליהוה אלהינו |
| SPויאמר משׁה גם אתה תתן בידנו זבחים ועלות ועשׂינו ליהוה אלהינו | |
| 26 | MTוגם מקננו ילך עמנו לא תשׁאר פרסה כי ממנו נקח לעבד את יהוה אלהינו ואנחנו לא נדע מה נעבד את יהוה עד באנו שׁמה |
| SPוגם מקנינו ילך עמנו לא תשׁאר פרסה כי ממנו נקח לעבד את יהוה אלהינו ואנחנו לא נדע מה נעבד את יהוה עד באנו שׁמה | |
| 27 | MTויחזק יהוה את לב פרעה ולא אבה לשׁלחם |
| SPויחזק יהוה את לב פרעה ולא אבה לשׁלחם | |
| 28 | MTויאמר לו פרעה לך מעלי השׁמר לך אל תסף ראות פני כי ביום ראתך פני תמות |
| SPויאמר לו פרעה לך לך מעלי השׁמר לך אל תוסיף ראות פני כי ביום ראותך פני תמות | |
| 29 | MTויאמר משׁה כן דברת לא אסף עוד ראות פניך |
| SPויאמר משׁה כן דברת לא אוסיף עוד ראות פניך |