| 1 | MTויאמר יהוה אל משׁה עתה תראה אשׁר אעשׂה לפרעה כי ביד חזקה ישׁלחם וביד חזקה יגרשׁם מארצו |
| SPויאמר יהוה אל משׁה אתה תראה את אשׁר אעשׂה לפרעה כי ביד חזקה ישׁלחם וביד חזקה יגרשׁם מארצו | |
| 2 | MTוידבר אלהים אל משׁה ויאמר אליו אני יהוה |
| SPוידבר יהוה אל משׁה ויאמר אליו אני יהוה | |
| 3 | MTוארא אל אברהם אל יצחק ואל יעקב באל שׁדי ושׁמי יהוה לא נודעתי להם |
| SPואראה אל אברהם ואל יצחק ואל יעקב באל שׁדי ושׁמי יהוה לא נודעתי להם | |
| 4 | MTוגם הקמתי את בריתי אתם לתת להם את ארץ כנען את ארץ מגריהם אשׁר גרו בה |
| SPוגם הקמתי את בריתי אתם לתת להם את ארץ כנען את ארץ מגריהם אשׁר גרו בה | |
| 5 | MTוגם אני שׁמעתי את נאקת בני ישׂראל אשׁר מצרים מעבדים אתם ואזכר את בריתי |
| SPוגם אני שׁמעתי את נקאת בני ישׂראל אשׁר מצרים מעבדים אתם ואזכרה את בריתי | |
| 6 | MTלכן אמר לבני ישׂראל אני יהוה והוצאתי אתכם מתחת סבלת מצרים והצלתי אתכם מעבדתם וגאלתי אתכם בזרוע נטויה ובשׁפטים גדלים |
| SPלכן אמר לבני ישׂראל אני יהוה והוצאתי אתכם מתחת סבלות מצרים והצלתי אתכם מעבדתם וגאלתי אתכם בזרוע נטויה ובמשׁפטים גדלים | |
| 7 | MTולקחתי אתכם לי לעם והייתי לכם לאלהים וידעתם כי אני יהוה אלהיכם המוציא אתכם מתחת סבלות מצרים |
| SPולקחתי אתכם לי לעם והייתי לכם לאלהים וידעתם כי אני יהוה אלהיכם המוצא אתכם מתחת סבלות מצרים | |
| 8 | MTוהבאתי אתכם אל הארץ אשׁר נשׂאתי את ידי לתת אתה לאברהם ליצחק וליעקב ונתתי אתה לכם מורשׁה אני יהוה |
| SPוהבאתי אתכם אל הארץ אשׁר נשׂאתי את ידי לתת אתה לאברהם ליצחק וליעקב ונתתי אתה לכם מורשׁה אני יהוה | |
| 9 | MTוידבר משׁה כן אל בני ישׂראל ולא שׁמעו אל משׁה מקצר רוח ומעבדה קשׁה |
| SPוידבר משׁה כן לבני ישׂראל ולא שׁמעו אל משׁה מקצר רוח ומעבדה קשׁה ויאמרו אל משׁה חדל נא ממנו ונעבדה את מצרים כי טוב לנו עבד את מצרים ממותנו במדבר | |
| 10 | MTוידבר יהוה אל משׁה לאמר |
| SPוידבר יהוה אל משׁה לאמר | |
| 11 | MTבא דבר אל פרעה מלך מצרים וישׁלח את בני ישׂראל מארצו |
| SPבא דבר אל פרעה מלך מצרים וישׁלח את בני ישׂראל מארצו | |
| 12 | MTוידבר משׁה לפני יהוה לאמר הן בני ישׂראל לא שׁמעו אלי ואיך ישׁמעני פרעה ואני ערל שׂפתים |
| SPוידבר משׁה לפני יהוה לאמר הן בני ישׂראל לא שׁמעו אלי ואיך ישׁמעני פרעה ואני ערל שׂפתים | |
| 13 | MTוידבר יהוה אל משׁה ואל אהרן ויצום אל בני ישׂראל ואל פרעה מלך מצרים להוציא את בני ישׂראל מארץ מצרים |
| SPוידבר יהוה אל משׁה ואל אהרן ויצום אל בני ישׂראל ואל פרעה מלך מצרים להוציא את בני ישׂראל מארץ מצרים | |
| 14 | MTאלה ראשׁי בית אבתם בני ראובן בכר ישׂראל חנוך ופלוא חצרון וכרמי אלה משׁפחת ראובן |
| SPואלה ראשׁי בית אבותם בני ראובן בכור ישׂראל חנוך ופלוא חצרון וכרמי אלה משׁפחות ראובן | |
| 15 | MTובני שׁמעון ימואל וימין ואהד ויכין וצחר ושׁאול בן הכנענית אלה משׁפחת שׁמעון |
| SPובני שׁמעון ימואל וימין ואחד ויכין וצהר ושׁאול בן הכנענית אלה משׁפחות שׁמעון | |
| 16 | MTואלה שׁמות בני לוי לתלדתם גרשׁון וקהת ומררי ושׁני חיי לוי שׁבע ושׁלשׁים ומאת שׁנה |
| SPואלה שׁמות בני לוי לתולדתם גרשׁון קהת ומררי ושׁני חיי לוי שׁבע ושׁלשׁים ומאת שׁנה | |
| 17 | MTבני גרשׁון לבני ושׁמעי למשׁפחתם |
| SPובני גרשׁון לבני ושׁמעי למשׁפחותם | |
| 18 | MTובני קהת עמרם ויצהר וחברון ועזיאל ושׁני חיי קהת שׁלשׁ ושׁלשׁים ומאת שׁנה |
| SPובני קהת עמרם ויצהר חברון ועזיאל ושׁני חיי קהת שׁלשׁ ושׁלשׁים ומאת שׁנה | |
| 19 | MTובני מררי מחלי ומושׁי אלה משׁפחת הלוי לתלדתם |
| SPובני מררי מחלי ומושׁי אלה משׁפחות הלוי לתולדתם | |
| 20 | MTויקח עמרם את יוכבד דדתו לו לאשׁה ותלד לו את אהרן ואת משׁה ושׁני חיי עמרם שׁבע ושׁלשׁים ומאת שׁנה |
| SPויקח עמרם את יוכבד דדתו לו לאשׁה ותלד לו את אהרן ואת משׁה ואת מרים אחותם ושׁני חיי עמרם שׁשׁ ושׁלשׁים ומאת שׁנה | |
| 21 | MTובני יצהר קרח ונפג וזכרי |
| SPובני יצהר קרח ונפג וזכרי | |
| 22 | MTובני עזיאל מישׁאל ואלצפן וסתרי |
| SPובני עזיאל מישׁאל ואליצפן וסתרי | |
| 23 | MTויקח אהרן את אלישׁבע בת עמינדב אחות נחשׁון לו לאשׁה ותלד לו את נדב ואת אביהוא את אלעזר ואת איתמר |
| SPויקח אהרן את אלישׁבע בת עמינדב אחות נחשׁון לו לאשׁה ותלד לו את נדב ואת אביהוא את אלעזר ואת איתמר | |
| 24 | MTובני קרח אסיר ואלקנה ואביאסף אלה משׁפחת הקרחי |
| SPובני קרח אסור ואלקנה ואביסף אלה משׁפחות הקרחי | |
| 25 | MTואלעזר בן אהרן לקח לו מבנות פוטיאל לו לאשׁה ותלד לו את פינחס אלה ראשׁי אבות הלוים למשׁפחתם |
| SPואלעזר בן אהרן לקח לו מבנות פוטאל לו לאשׁה ותלד לו את פינחס אלה ראשׁי אבות הלוי למשׁפחותם | |
| 26 | MTהוא אהרן ומשׁה אשׁר אמר יהוה להם הוציאו את בני ישׂראל מארץ מצרים על צבאתם |
| SPהוא אהרן ומשׁה אשׁר אמר יהוה להם הוציאו את בני ישׂראל מארץ מצרים על צבאתם | |
| 27 | MTהם המדברים אל פרעה מלך מצרים להוציא את בני ישׂראל ממצרים הוא משׁה ואהרן |
| SPהם המדברים אל פרעה מלך מצרים להוציא את בני ישׂראל מארץ מצרים הוא משׁה ואהרן | |
| 28 | MTויהי ביום דבר יהוה אל משׁה בארץ מצרים |
| SPויהי ביום דבר יהוה אל משׁה בארץ מצרים | |
| 29 | MTוידבר יהוה אל משׁה לאמר אני יהוה דבר אל פרעה מלך מצרים את כל אשׁר אני דבר אליך |
| SPוידבר יהוה אל משׁה לאמר אני יהוה דבר אל פרעה מלך מצרים את כל אשׁר אני דבר אליך | |
| 30 | MTויאמר משׁה לפני יהוה הן אני ערל שׂפתים ואיך ישׁמע אלי פרעה |
| SPויאמר משׁה לפני יהוה הן אני ערל שׂפתים ואיך ישׁמעני פרעה |