| 1 | MTשׁמע ישׂראל אתה עבר היום את הירדן לבא לרשׁת גוים גדלים ועצמים ממך ערים גדלת ובצרת בשׁמים |
| SPשׁמע ישׂראל אתה עבר היום את הירדן לבוא לרשׁת גוים גדלים ועצמים ממך ערים גדלות ובצרות בשׁמים | |
| 2 | MTעם גדול ורם בני ענקים אשׁר אתה ידעת ואתה שׁמעת מי יתיצב לפני בני ענק |
| SPעם גדול ורם בני ענקים אשׁר אתה ידעת ואתה שׁמעת מי יתיצב לפני בני ענק | |
| 3 | MTוידעת היום כי יהוה אלהיך הוא העבר לפניך אשׁ אכלה הוא ישׁמידם והוא יכניעם לפניך והורשׁתם והאבדתם מהר כאשׁר דבר יהוה לך |
| SPוידעת היום כי יהוה אלהיך הוא העבר לפניך אשׁ אכלה הוא ישׁמידם והוא יכנעם לפניך והורשׁתם ואבדתם מהר כאשׁר דבר יהוה לך | |
| 4 | MTאל תאמר בלבבך בהדף יהוה אלהיך אתם מלפניך לאמר בצדקתי הביאני יהוה לרשׁת את הארץ הזאת וברשׁעת הגוים האלה יהוה מורישׁם מפניך |
| SPאל תאמר בלבבך בהדיף יהוה אלהיך אתם מפניך לאמר בצדקתי הביאני יהוה לרשׁת את הארץ הזאת וברשׁעת הגוים האלה יהוה מורישׁם מפניך | |
| 5 | MTלא בצדקתך ובישׁר לבבך אתה בא לרשׁת את ארצם כי ברשׁעת הגוים האלה יהוה אלהיך מורישׁם מפניך ולמען הקים את הדבר אשׁר נשׁבע יהוה לאבתיך לאברהם ליצחק וליעקב |
| SPלא בצדקתך ובישׁר לבבך אתה בא לרשׁת את ארצם כי ברשׁעת הגוים האלה יהוה מורישׁם מפניך ולמען הקים את הדבר אשׁר נשׁבע לאבתיך לאברהם ליצחק וליעקב | |
| 6 | MTוידעת כי לא בצדקתך יהוה אלהיך נתן לך את הארץ הטובה הזאת לרשׁתה כי עם קשׁה ערף אתה |
| SPוידעת כי לא בצדקתך יהוה אלהיך נתן לך את הארץ הטובה הזאת לרשׁתה כי עם קשׁה ערף אתה | |
| 7 | MTזכר אל תשׁכח את אשׁר הקצפת את יהוה אלהיך במדבר למן היום אשׁר יצאת מארץ מצרים עד באכם עד המקום הזה ממרים הייתם עם יהוה |
| SPזכור ואל תשׁכח את אשׁר הקצפת את יהוה אלהיך במדבר למן היום אשׁר יצאתם מארץ מצרים עד באכם עד המקום הזה ממרים הייתם עם יהוה | |
| 8 | MTובחרב הקצפתם את יהוה ויתאנף יהוה בכם להשׁמיד אתכם |
| SPובחורב הקצפתם את יהוה ויתאנף יהוה בכם להשׁמיד אתכם | |
| 9 | MTבעלתי ההרה לקחת לוחת האבנים לוחת הברית אשׁר כרת יהוה עמכם ואשׁב בהר ארבעים יום וארבעים לילה לחם לא אכלתי ומים לא שׁתיתי |
| SPבעלותי ההרה לקחת לוחות האבנים לוחת הברית אשׁר כרת יהוה עמכם ואשׁב בהר ארבעים יום וארבעים לילה לחם לא אכלתי ומים לא שׁתיתי | |
| 10 | MTויתן יהוה אלי את שׁני לוחת האבנים כתבים באצבע אלהים ועליהם ככל הדברים אשׁר דבר יהוה עמכם בהר מתוך האשׁ ביום הקהל |
| SPויתן יהוה אלי את שׁני לוחת האבנים כתובים באצבע אלהים ועליהם ככל הדברים אשׁר דבר יהוה אליכם בהר מתוך האשׁ ביום הקהל | |
| 11 | MTויהי מקץ ארבעים יום וארבעים לילה נתן יהוה אלי את שׁני לחת האבנים לחות הברית |
| SPויהי מקץ ארבעים יום וארבעים לילה נתן יהוה אלי את שׁני לוחת הברית | |
| 12 | MTויאמר יהוה אלי קום רד מהר מזה כי שׁחת עמך אשׁר הוצאת ממצרים סרו מהר מן הדרך אשׁר צויתם עשׂו להם מסכה |
| SPויאמר יהוה אלי קום רד מהר מזה כי שׁחת עמך אשׁר הוצאת ממצרים סרו מהר מן הדרך אשׁר צויתם עשׂו להם עגל מסכה | |
| 13 | MTויאמר יהוה אלי לאמר ראיתי את העם הזה והנה עם קשׁה ערף הוא |
| SPויאמר יהוה אלי לאמר ראיתי את העם הזה והנה עם קשׁה ערף הוא | |
| 14 | MTהרף ממני ואשׁמידם ואמחה את שׁמם מתחת השׁמים ואעשׂה אותך לגוי עצום ורב ממנו |
| SPהרף ממני ואשׁמידם ואמחה את שׁמם מתחת השׁמים ואעשׂה אתך לגוי עצום ורב ממנו | |
| 15 | MTואפן וארד מן ההר וההר בער באשׁ ושׁני לחת הברית על שׁתי ידי |
| SPואפנה וארדה מן ההר וההר בער באשׁ ושׁני לוחת הברית על שׁתי ידי | |
| 16 | MTוארא והנה חטאתם ליהוה אלהיכם עשׂיתם לכם עגל מסכה סרתם מהר מן הדרך אשׁר צוה יהוה אתכם |
| SPואראה והנה חטאתם ליהוה אלהיכם עשׂיתם לכם עגל מסכה סרתם מהר מן הדרך אשׁר צוה יהוה אתכם | |
| 17 | MTואתפשׂ בשׁני הלחת ואשׁלכם מעל שׁתי ידי ואשׁברם לעיניכם |
| SPואתפשׂה בשׁני הלוחות ואשׁליכם מעל שׁתי ידי ואשׁברם לעיניכם | |
| 18 | MTואתנפל לפני יהוה כראשׁנה ארבעים יום וארבעים לילה לחם לא אכלתי ומים לא שׁתיתי על כל חטאתכם אשׁר חטאתם לעשׂות הרע בעיני יהוה להכעיסו |
| SPואתנפלה לפני יהוה כראישׁונה ארבעים יום וארבעים לילה לחם לא אכלתי ומים לא שׁתיתי על כל חטאתיכם אשׁר חטאתם לעשׂות הרע בעיני יהוה להכעיסו | |
| 19 | MTכי יגרתי מפני האף והחמה אשׁר קצף יהוה עליכם להשׁמיד אתכם וישׁמע יהוה אלי גם בפעם ההוא |
| SPכי יגרתי מפני האף והחמה אשׁר קצף יהוה עליכם להשׁמיד אתכם וישׁמע יהוה אלי גם בפעם ההוא | |
| 20 | MTובאהרן התאנף יהוה מאד להשׁמידו ואתפלל גם בעד אהרן בעת ההוא |
| SPובאהרן התאנף יהוה מאד להשׁמידו ואתפללה גם בעד אהרן בעת ההיא | |
| 21 | MTואת חטאתכם אשׁר עשׂיתם את העגל לקחתי ואשׂרף אתו באשׁ ואכת אתו טחון היטב עד אשׁר דק לעפר ואשׁלך את עפרו אל הנחל הירד מן ההר |
| SPואת חטאתיכם אשׁר עשׂיתם את העגל לקחתי ואשׂרפה אתו באשׁ ואכתה אתו טחון הייטב עד אשׁר דק לעפר ואשׁליכה את עפרו אל הנחל היורד מן ההר | |
| 22 | MTובתבערה ובמסה ובקברת התאוה מקצפים הייתם את יהוה |
| SPובתבערה ובמסה ובקברות התאוה מקצפים הייתם את יהוה | |
| 23 | MTובשׁלח יהוה אתכם מקדשׁ ברנע לאמר עלו ורשׁו את הארץ אשׁר נתתי לכם ותמרו את פי יהוה אלהיכם ולא האמנתם לו ולא שׁמעתם בקלו |
| SPובשׁלח יהוה אתכם מקדשׁ ברנע לאמר עלו ורשׁו את הארץ אשׁר נתתי לכם ותמרו את פי יהוה אלהיכם ולא האמנתם לו ולא שׁמעתם בקולו | |
| 24 | MTממרים הייתם עם יהוה מיום דעתי אתכם |
| SPממרים הייתם עם יהוה מיום דעתו אתכם | |
| 25 | MTואתנפל לפני יהוה את ארבעים היום ואת ארבעים הלילה אשׁר התנפלתי כי אמר יהוה להשׁמיד אתכם |
| SPואתנפלה לפני יהוה את ארבעים היום ואת ארבעים הלילה אשׁר התנפלתי כי אמר יהוה להשׁמיד אתכם | |
| 26 | MTואתפלל אל יהוה ואמר אדני יהוה אל תשׁחת עמך ונחלתך אשׁר פדית בגדלך אשׁר הוצאת ממצרים ביד חזקה |
| SPואתפללה אל יהוה ואמרה אדני יהוה אל תשׁחית עמך ונחלתך אשׁר פדית בגדלך אשׁר הוצאת ממצרים בידך החזקה | |
| 27 | MTזכר לעבדיך לאברהם ליצחק וליעקב אל תפן אל קשׁי העם הזה ואל רשׁעו ואל חטאתו |
| SPזכור לעבדיך לאברהם ליצחק וליעקב אל תפן אל קשׁה העם הזה ואל רשׁעו ואל חטאתו | |
| 28 | MTפן יאמרו הארץ אשׁר הוצאתנו משׁם מבלי יכלת יהוה להביאם אל הארץ אשׁר דבר להם ומשׂנאתו אותם הוציאם להמתם במדבר |
| SPפן יאמרו עם הארץ אשׁר הוצאתנו משׁם מבלתי יכלת יהוה להביא אתם אל הארץ אשׁר דבר להם ומשׂנאתו אתם הוציאם להמיתם במדבר | |
| 29 | MTוהם עמך ונחלתך אשׁר הוצאת בכחך הגדל ובזרעך הנטויה |
| SPוהם עמך ונחלתך אשׁר הוצאת ממצרים בכחך הגדול ובזרועך הנטויה |