| 1 | MTועתה ישׂראל שׁמע אל החקים ואל המשׁפטים אשׁר אנכי מלמד אתכם לעשׂות למען תחיו ובאתם וירשׁתם את הארץ אשׁר יהוה אלהי אבתיכם נתן לכם |
| SPועתה ישׂראל שׁמע אל החקים ואל המשׁפטים אשׁר אנכי מלמד אתכם לעשׂות למען תחיון ובאתם וירשׁתם את הארץ אשׁר יהוה אלהי אבתיכם נתן לכם | |
| 2 | MTלא תספו על הדבר אשׁר אנכי מצוה אתכם ולא תגרעו ממנו לשׁמר את מצות יהוה אלהיכם אשׁר אנכי מצוה אתכם |
| SPלא תוסיפו על הדבר אשׁר אנכי מצוה אתכם היום ולא תגרעו ממנו לשׁמר את מצות יהוה אלהיכם אשׁר אנכי מצוה אתכם | |
| 3 | MTעיניכם הראת את אשׁר עשׂה יהוה בבעל פעור כי כל האישׁ אשׁר הלך אחרי בעל פעור השׁמידו יהוה אלהיך מקרבך |
| SPעיניכם הראות את אשׁר עשׂה יהוה בבעל פעור כי כל האישׁ אשׁר הלך אחרי בעל פעור השׁמידו יהוה אלהיך מקרבך | |
| 4 | MTואתם הדבקים ביהוה אלהיכם חיים כלכם היום |
| SPואתם הדביקים ביהוה אלהיכם חיים כלכם היום | |
| 5 | MTראה למדתי אתכם חקים ומשׁפטים כאשׁר צוני יהוה אלהי לעשׂות כן בקרב הארץ אשׁר אתם באים שׁמה לרשׁתה |
| SPראו למדתי אתכם חקים ומשׁפטים כאשׁר צוני יהוה אלהי לעשׂות כן בקרב הארץ אשׁר אתם באים שׁמה לרשׁתה | |
| 6 | MTושׁמרתם ועשׂיתם כי הוא חכמתכם ובינתכם לעיני העמים אשׁר ישׁמעון את כל החקים האלה ואמרו רק עם חכם ונבון הגוי הגדול הזה |
| SPושׁמרתם ועשׂיתם כי היא חכמתכם ובינתכם לעיני העמים אשׁר ישׁמעו את כל החקים האלה ואמרו רק עם חכום ונבון הגוי הגדול הזה | |
| 7 | MTכי מי גוי גדול אשׁר לו אלהים קרבים אליו כיהוה אלהינו בכל קראנו אליו |
| SPכי מי גוי גדול אשׁר לו אלהים קרובים אליו כיהוה אלהינו בכל קראנו אליו | |
| 8 | MTומי גוי גדול אשׁר לו חקים ומשׁפטים צדיקם ככל התורה הזאת אשׁר אנכי נתן לפניכם היום |
| SPומי גוי גדול אשׁר לו חקים ומשׁפטים צדקים ככל התורה הזאת אשׁר אנכי נתן לפניכם היום | |
| 9 | MTרק השׁמר לך ושׁמר נפשׁך מאד פן תשׁכח את הדברים אשׁר ראו עיניך ופן יסורו מלבבך כל ימי חייך והודעתם לבניך ולבני בניך |
| SPרק השׁמר לך ושׁמור נפשׁך מאד פן תשׁכח את הדברים אשׁר ראו עיניך ופן יסורו מלבבך כל ימי חייך והודעתם לבניך ולבני בניך | |
| 10 | MTיום אשׁר עמדת לפני יהוה אלהיך בחרב באמר יהוה אלי הקהל לי את העם ואשׁמעם את דברי אשׁר ילמדון ליראה אתי כל הימים אשׁר הם חיים על האדמה ואת בניהם ילמדון |
| SPיום אשׁר עמדת לפני יהוה אלהיך בחורב באמר יהוה אלי הקהל לי את העם ואשׁמיעם את דברי אשׁר ילמדון ליראה אתי כל הימים אשׁר הם חיים על האדמה ואת בניהם ילמדון | |
| 11 | MTותקרבון ותעמדון תחת ההר וההר בער באשׁ עד לב השׁמים חשׁך ענן וערפל |
| SPותקרבון ותעמדון תחת ההר וההר בער באשׁ עד לבב השׁמים חשׁך ענן וערפל | |
| 12 | MTוידבר יהוה אליכם מתוך האשׁ קול דברים אתם שׁמעים ותמונה אינכם ראים זולתי קול |
| SPוידבר יהוה אליכם מתוך האשׁ קול דברים אתם שׁמעים ותמונה אינכם ראים זולתי קול | |
| 13 | MTויגד לכם את בריתו אשׁר צוה אתכם לעשׂות עשׂרת הדברים ויכתבם על שׁני לחות אבנים |
| SPויגד לכם את בריתו אשׁר צוה אתכם לעשׂות עשׂרת הדברים ויכתבם על שׁני לוחת אבנים | |
| 14 | MTואתי צוה יהוה בעת ההוא ללמד אתכם חקים ומשׁפטים לעשׂתכם אתם בארץ אשׁר אתם עברים שׁמה לרשׁתה |
| SPואתי צוה יהוה בעת ההיא ללמד אתכם חקים ומשׁפטים לעשׂותכם אתם בארץ אשׁר אתם עברים שׁמה לרשׁתה | |
| 15 | MTונשׁמרתם מאד לנפשׁתיכם כי לא ראיתם כל תמונה ביום דבר יהוה אליכם בחרב מתוך האשׁ |
| SPונשׁמרתם מאד לנפשׁתיכם כי לא ראיתם כל תמונה ביום דבר יהוה אליכם בחורב מתוך האשׁ | |
| 16 | MTפן תשׁחתון ועשׂיתם לכם פסל תמונת כל סמל תבנית זכר או נקבה |
| SPפן תשׁחתון ועשׂיתם לכם פסל תמונת כל סמל תבנית זכר או נקבה | |
| 17 | MTתבנית כל בהמה אשׁר בארץ תבנית כל צפור כנף אשׁר תעוף בשׁמים |
| SPתבנית כל בהמה אשׁר בארץ תבנית כל צפור כנף אשׁר תעף בשׁמים | |
| 18 | MTתבנית כל רמשׂ באדמה תבנית כל דגה אשׁר במים מתחת לארץ |
| SPתבנית כל רמשׂ באדמה תבנית כל דגי אשׁר במים מתחת לארץ | |
| 19 | MTופן תשׂא עיניך השׁמימה וראית את השׁמשׁ ואת הירח ואת הכוכבים כל צבא השׁמים ונדחת והשׁתחוית להם ועבדתם אשׁר חלק יהוה אלהיך אתם לכל העמים תחת כל השׁמים |
| SPופן תשׂא עיניך השׁמים וראית את השׁמשׁ ואת הירח ואת הכוכבים כל צבא השׁמים ונדחת והשׁתחוית להם ועבדתם אשׁר חלק יהוה אלהיך אתם לכל העמים תחת כל השׁמים | |
| 20 | MTואתכם לקח יהוה ויוצא אתכם מכור הברזל ממצרים להיות לו לעם נחלה כיום הזה |
| SPואתכם לקח יהוה ויוצא אתכם מכור הברזל ממצרים להיות לו לעם נחלה כיום הזה | |
| 21 | MTויהוה התאנף בי על דבריכם וישׁבע לבלתי עברי את הירדן ולבלתי בא אל הארץ הטובה אשׁר יהוה אלהיך נתן לך נחלה |
| SPויהוה התאנף בי על דבריכם לבלתי עברי את הירדן ולבלתי בא אל הארץ הטובה אשׁר יהוה אלהיך נתן לך נחלה | |
| 22 | MTכי אנכי מת בארץ הזאת אינני עבר את הירדן ואתם עברים וירשׁתם את הארץ הטובה הזאת |
| SPכי אנכי מת בארץ הזאת אינני עבר את הירדן ואתם עברים וירשׁתם את הארץ הטובה הזאת | |
| 23 | MTהשׁמרו לכם פן תשׁכחו את ברית יהוה אלהיכם אשׁר כרת עמכם ועשׂיתם לכם פסל תמונת כל אשׁר צוך יהוה אלהיך |
| SPהשׁמרו לכם פן תשׁכחו את ברית יהוה אלהיכם אשׁר כרת עמכם ועשׂיתם לכם פסל תמונת כל אשׁר צוך יהוה אלהיך | |
| 24 | MTכי יהוה אלהיך אשׁ אכלה הוא אל קנא |
| SPכי יהוה אלהיך אשׁ אכלה הוא אל קנא | |
| 25 | MTכי תוליד בנים ובני בנים ונושׁנתם בארץ והשׁחתם ועשׂיתם פסל תמונת כל ועשׂיתם הרע בעיני יהוה אלהיך להכעיסו |
| SPכי תולידו בנים ובני בנים ונושׁנתם בארץ והשׁחתם ועשׂיתם פסל תמונת כל ועשׂיתם הרע בעיני יהוה אלהיכם להכעיסו | |
| 26 | MTהעידתי בכם היום את השׁמים ואת הארץ כי אבד תאבדון מהר מעל הארץ אשׁר אתם עברים את הירדן שׁמה לרשׁתה לא תאריכן ימים עליה כי השׁמד תשׁמדון |
| SPהעדתי בכם היום את השׁמים ואת הארץ כי אבד תאבדון מהר מעל הארץ אשׁר אתם עברים את הירדן שׁמה לרשׁתה לא תאריכון ימים עליה כי השׁמד תשׁמדון | |
| 27 | MTוהפיץ יהוה אתכם בעמים ונשׁארתם מתי מספר בגוים אשׁר ינהג יהוה אתכם שׁמה |
| SPוהפיץ יהוה אתכם בעמים ונשׁארתם מתי מספר בגוים אשׁר ינהג יהוה אתכם שׁמה | |
| 28 | MTועבדתם שׁם אלהים מעשׂה ידי אדם עץ ואבן אשׁר לא יראון ולא ישׁמעון ולא יאכלון ולא יריחן |
| SPועבדתם שׁם אלהים מעשׂה ידי אדם עץ ואבן אשׁר לא יראון ולא ישׁמעון ולא יאכלון ולא יריחון | |
| 29 | MTובקשׁתם משׁם את יהוה אלהיך ומצאת כי תדרשׁנו בכל לבבך ובכל נפשׁך |
| SPובקשׁת משׁם את יהוה אלהיך ומצאתו כי תדרשׁנו בכל לבבך ובכל נפשׁך | |
| 30 | MTבצר לך ומצאוך כל הדברים האלה באחרית הימים ושׁבת עד יהוה אלהיך ושׁמעת בקלו |
| SPבצר לך ומצאוך כל הדברים האלה באחרית הימים ושׁבת עד יהוה אלהיך ושׁמעת בקולו | |
| 31 | MTכי אל רחום יהוה אלהיך לא ירפך ולא ישׁחיתך ולא ישׁכח את ברית אבתיך אשׁר נשׁבע להם |
| SPכי אל רחום יהוה אלהיך לא ירפך ולא ישׁחיתך ולא ישׁכח את ברית אבתיך אשׁר נשׁבע להם | |
| 32 | MTכי שׁאל נא לימים ראשׁנים אשׁר היו לפניך למן היום אשׁר ברא אלהים אדם על הארץ ולמקצה השׁמים ועד קצה השׁמים הנהיה כדבר הגדול הזה או הנשׁמע כמהו |
| SPכי שׁאל נא לימים הראישׁונים אשׁר היו לפניך למן היום אשׁר ברא אלהים אדם על הארץ ולמקצה השׁמים ועד קצה השׁמים הן היה כדבר הגדול הזה או הנשׁמע כמהו | |
| 33 | MTהשׁמע עם קול אלהים מדבר מתוך האשׁ כאשׁר שׁמעת אתה ויחי |
| SPהשׁמע עם קול אלהים חיים מדבר מתוך האשׁ כאשׁר שׁמעת אתה ויחי | |
| 34 | MTאו הנסה אלהים לבוא לקחת לו גוי מקרב גוי במסת באתת ובמופתים ובמלחמה וביד חזקה ובזרוע נטויה ובמוראים גדלים ככל אשׁר עשׂה לכם יהוה אלהיכם במצרים לעיניך |
| SPאו הנסה אלהים לבוא לקחת לו גוי מקרב גוי במסות באתות ובמופתים ובמלחמה וביד חזקה ובזרוע נטויה ובמראים גדלים ככל אשׁר עשׂה לכם יהוה אלהיכם במצרים לעיניכם | |
| 35 | MTאתה הראת לדעת כי יהוה הוא האלהים אין עוד מלבדו |
| SPאתה הראת לדעת כי יהוה הוא האלהים אין עוד מלבדו | |
| 36 | MTמן השׁמים השׁמיעך את קלו ליסרך ועל הארץ הראך את אשׁו הגדולה ודבריו שׁמעת מתוך האשׁ |
| SPמן השׁמים השׁמיעך את קולו ליסרך ועל הארץ הראך את אשׁו הגדלה ודבריו שׁמעת מתוך האשׁ | |
| 37 | MTותחת כי אהב את אבתיך ויבחר בזרעו אחריו ויוצאך בפניו בכחו הגדל ממצרים |
| SPותחת כי אהב את אבתיך ויבחר בזרעם אחריהם ויוציאך בפניו ובכחו הגדול ממצרים | |
| 38 | MTלהורישׁ גוים גדלים ועצמים ממך מפניך להביאך לתת לך את ארצם נחלה כיום הזה |
| SPלהורישׁ גוים גדלים ועצמים ממך מפניך להביאך לתת לך את ארצם נחלה כיום הזה | |
| 39 | MTוידעת היום והשׁבת אל לבבך כי יהוה הוא האלהים בשׁמים ממעל ועל הארץ מתחת אין עוד |
| SPוידעת היום והשׁבות אל לבבך כי יהוה הוא האלהים בשׁמים ממעל ועל הארץ מתחת אין עוד | |
| 40 | MTושׁמרת את חקיו ואת מצותיו אשׁר אנכי מצוך היום אשׁר ייטב לך ולבניך אחריך ולמען תאריך ימים על האדמה אשׁר יהוה אלהיך נתן לך כל הימים |
| SPושׁמרת את חקיו ואת מצותיו אשׁר אנכי מצוך היום אשׁר ייטב לך ולבניך אחריך ולמען תאריך ימים על האדמה אשׁר יהוה אלהיך נתן לך כל הימים | |
| 41 | MTאז יבדיל משׁה שׁלשׁ ערים בעבר הירדן מזרחה שׁמשׁ |
| SPאז יבדיל משׁה שׁלשׁ ערים בעבר הירדן מזרח השׁמשׁ | |
| 42 | MTלנס שׁמה רוצח אשׁר ירצח את רעהו בבלי דעת והוא לא שׂנא לו מתמול שׁלשׁום ונס אל אחת מן הערים האל וחי |
| SPלנוס שׁמה הרצח אשׁר ירצח את רעהו בבלי דעת והוא לא שׂנא לו מתמול שׁלשׁום ונס אל אחת מן הערים האלה וחי | |
| 43 | MTאת בצר במדבר בארץ המישׁר לראובני ואת ראמת בגלעד לגדי ואת גולן בבשׁן למנשׁי |
| SPאת בוצר במדבר בארץ המישׁור לראובני ואת רמות בגלעד לגדי ואת גולן בבשׁן למנשׁה | |
| 44 | MTוזאת התורה אשׁר שׂם משׁה לפני בני ישׂראל |
| SPוזאת התורה אשׁר שׂם משׁה לפני בני ישׂראל | |
| 45 | MTאלה העדת והחקים והמשׁפטים אשׁר דבר משׁה אל בני ישׂראל בצאתם ממצרים |
| SPאלה העדות החקים והמשׁפטים אשׁר דבר משׁה אל בני ישׂראל בצאתם ממצרים | |
| 46 | MTבעבר הירדן בגיא מול בית פעור בארץ סיחן מלך האמרי אשׁר יושׁב בחשׁבון אשׁר הכה משׁה ובני ישׂראל בצאתם ממצרים |
| SPבעבר הירדן בגיא מול בית פעור בארץ סיחון מלך האמרי אשׁר ישׁב בחשׁבון אשׁר הכה משׁה ובני ישׂראל בצאתם ממצרים | |
| 47 | MTויירשׁו את ארצו ואת ארץ עוג מלך הבשׁן שׁני מלכי האמרי אשׁר בעבר הירדן מזרח שׁמשׁ |
| SPויירשׁו את ארצו ואת ארץ עוג מלך הבשׁן שׁני מלכי האמרי אשׁר בעבר הירדן מזרח השׁמשׁ | |
| 48 | MTמערער אשׁר על שׂפת נחל ארנן ועד הר שׂיאן הוא חרמון |
| SPמערער אשׁר על שׂפת נחל ארנן ועד הר שׂיאון הוא חרמון | |
| 49 | MTוכל הערבה עבר הירדן מזרחה ועד ים הערבה תחת אשׁדת הפסגה |
| SPוכל הערבה עבר הירדן מזרחה ועד ים הערבה ים המלח תחת אשׁדות הפסגה |