| 1 | MTועשׂה בצלאל ואהליאב וכל אישׁ חכם לב אשׁר נתן יהוה חכמה ותבונה בהמה לדעת לעשׂת את כל מלאכת עבדת הקדשׁ לכל אשׁר צוה יהוה |
| SPועשׂה בצלאל ואהליאב וכל אישׁ חכם לב אשׁר נתן יהוה בהם חכמה ותבונה לדעת לעשׂות את כל מלאכת עבדת הקדשׁ לכל אשׁר צוה יהוה | |
| 2 | MTויקרא משׁה אל בצלאל ואל אהליאב ואל כל אישׁ חכם לב אשׁר נתן יהוה חכמה בלבו כל אשׁר נשׂאו לבו לקרבה אל המלאכה לעשׂת אתה |
| SPויקרא משׁה אל בצלאל ואל אהליאב ואל כל אישׁ חכם לב אשׁר נתן יהוה חכמה בלבו כל אשׁר נשׂאו לבו לקרב אל המלאכה לעשׂות אתה | |
| 3 | MTויקחו מלפני משׁה את כל התרומה אשׁר הביאו בני ישׂראל למלאכת עבדת הקדשׁ לעשׂת אתה והם הביאו אליו עוד נדבה בבקר בבקר |
| SPויקחו מלפני משׁה את כל התרומה אשׁר הביאו בני ישׂראל למלאכת עבדת הקדשׁ לעשׂות אתה והם הביאו אליו עוד נדבה בבקר בבקר | |
| 4 | MTויבאו כל החכמים העשׂים את כל מלאכת הקדשׁ אישׁ אישׁ ממלאכתו אשׁר המה עשׂים |
| SPויביאו כל החכמים העשׂים את כל מלאכת הקדשׁ אישׁ אישׁ ממלאכתו אשׁר הם עשׂים | |
| 5 | MTויאמרו אל משׁה לאמר מרבים העם להביא מדי העבדה למלאכה אשׁר צוה יהוה לעשׂת אתה |
| SPוידברו אל משׁה לאמר מרבים העם להביא מדי העבדה למלאכה אשׁר צוה יהוה לעשׂות אתה | |
| 6 | MTויצו משׁה ויעבירו קול במחנה לאמר אישׁ ואשׁה אל יעשׂו עוד מלאכה לתרומת הקדשׁ ויכלא העם מהביא |
| SPויצו משׁה ויעברו קול במחנה לאמר אישׁ ואשׁה אל יעשׂה עוד מלאכה לתרומת הקדשׁ ויכל העם מהביא | |
| 7 | MTוהמלאכה היתה דים לכל המלאכה לעשׂות אתה והותר |
| SPוהמלאכה היתה דים לכל המלאכה לעשׂות אתה והותירו | |
| 8 | MTויעשׂו כל חכם לב בעשׂי המלאכה את המשׁכן עשׂר יריעת שׁשׁ משׁזר ותכלת וארגמן ותולעת שׁני כרבים מעשׂה חשׁב עשׂה אתם |
| SPויעשׂו כל חכמי לב בעשׂאי המלאכה את המשׁכן עשׂו עשׂר יריעות שׁשׁ משׁזר תכלת וארגמן ותולעת שׁני כרובים מעשׂה חשׁב עשׂה אתם | |
| 9 | MTארך היריעה האחת שׁמנה ועשׂרים באמה ורחב ארבע באמה היריעה האחת מדה אחת לכל היריעת |
| SPארך היריעה האחת שׁמנה ועשׂרים באמה ורחב ארבע באמה היריעה האחת מדה אחת לכל היריעות | |
| 10 | MTויחבר את חמשׁ היריעת אחת אל אחת וחמשׁ יריעת חבר אחת אל אחת |
| SPויחבר את חמשׁ היריעות אחת אל אחת וחמשׁ היריעות חבר אחת אל אחת | |
| 11 | MTויעשׂ ללאת תכלת על שׂפת היריעה האחת מקצה במחברת כן עשׂה בשׂפת היריעה הקיצונה במחברת השׁנית |
| SPויעשׂ ללאות תכלת על שׂפת היריעה האחת בקצה במחברת וכן עשׂה בשׂפת היריעה הקצונה במחברת השׁנית | |
| 12 | MTחמשׁים ללאת עשׂה ביריעה האחת וחמשׁים ללאת עשׂה בקצה היריעה אשׁר במחברת השׁנית מקבילת הללאת אחת אל אחת |
| SPחמשׁים ללאות עשׂה ביריעה האחת וחמשׁים ללאות עשׂה בקצה היריעה אשׁר במחברת השׁנית מקבלות הללאות אחת אל אחת | |
| 13 | MTויעשׂ חמשׁים קרסי זהב ויחבר את הירעת אחת אל אחת בקרסים ויהי המשׁכן אחד |
| SPויעשׂ חמשׁים קרסי זהב ויחבר את היריעות אחת אל אחת בקרסים ויהי המשׁכן אחד | |
| 14 | MTויעשׂ יריעת עזים לאהל על המשׁכן עשׁתי עשׂרה יריעת עשׂה אתם |
| SPויעשׂ יריעות עזים לאהל על המשׁכן עשׁתה עשׂרה יריעות עשׂה אתם | |
| 15 | MTארך היריעה האחת שׁלשׁים באמה וארבע אמות רחב היריעה האחת מדה אחת לעשׁתי עשׂרה יריעת |
| SPארך היריעה האחת שׁלשׁים באמה וארבע אמות רחב היריעה האחת מדה אחת לעשׁתה עשׂרה היריעות | |
| 16 | MTויחבר את חמשׁ היריעת לבד ואת שׁשׁ היריעת לבד |
| SPויחבר את חמשׁ היריעות לבד ואת שׁשׁ היריעות לבד | |
| 17 | MTויעשׂ ללאת חמשׁים על שׂפת היריעה הקיצנה במחברת וחמשׁים ללאת עשׂה על שׂפת היריעה החברת השׁנית |
| SPויעשׂ ללאות חמשׁים על שׂפת היריעה האחת הקצונה במחברת וחמשׁים ללאות עשׂה על שׂפת היריעה החברת השׁנית | |
| 18 | MTויעשׂ קרסי נחשׁת חמשׁים לחבר את האהל להית אחד |
| SPויעשׂ קרסי נחשׁת חמשׁים לחבר את האהל להיות אחד | |
| 19 | MTויעשׂ מכסה לאהל ערת אלים מאדמים ומכסה ערת תחשׁים מלמעלה |
| SPויעשׂ מכסה לאהל עורת אילים מאדמים ומכסה עורת תחשׁים מלמעלה | |
| 20 | MTויעשׂ את הקרשׁים למשׁכן עצי שׁטים עמדים |
| SPויעשׂ את הקרשׁים למשׁכן עצי שׁטים עמדים | |
| 21 | MTעשׂר אמת ארך הקרשׁ ואמה וחצי האמה רחב הקרשׁ האחד |
| SPעשׂר אמות ארך הקרשׁ האחד אמה וחצי האמה רחב הקרשׁ האחד | |
| 22 | MTשׁתי ידת לקרשׁ האחד משׁלבת אחת אל אחת כן עשׂה לכל קרשׁי המשׁכן |
| SPשׁתי ידות לקרשׁ האחד משׁלבות אחת אל אחת כן עשׂה לכל קרשׁי המשׁכן | |
| 23 | MTויעשׂ את הקרשׁים למשׁכן עשׂרים קרשׁים לפאת נגב תימנה |
| SPויעשׂ את הקרשׁים למשׁכן עשׂרים קרשׁים לפאת נגבה תימנה | |
| 24 | MTוארבעים אדני כסף עשׂה תחת עשׂרים הקרשׁים שׁני אדנים תחת הקרשׁ האחד לשׁתי ידתיו ושׁני אדנים תחת הקרשׁ האחד לשׁתי ידתיו |
| SPוארבעים אדני כסף עשׂה תחת עשׂרים הקרשׁים שׁני אדנים תחת הקרשׁ האחד לשׁתי יתדתיו ושׁני אדנים תחת הקרשׁ האחד לשׁתי יתדתיו | |
| 25 | MTולצלע המשׁכן השׁנית לפאת צפון עשׂה עשׂרים קרשׁים |
| SPולצלע המשׁכן השׁנית לפאת צפונה עשׂה עשׂרים קרשׁים | |
| 26 | MTוארבעים אדניהם כסף שׁני אדנים תחת הקרשׁ האחד ושׁני אדנים תחת הקרשׁ האחד |
| SPוארבעים אדניהם כסף שׁני אדנים תחת הקרשׁ האחד ושׁני אדנים תחת הקרשׁ האחד | |
| 27 | MTולירכתי המשׁכן ימה עשׂה שׁשׁה קרשׁים |
| SPולירכתי המשׁכן ימה עשׂה שׁשׁה קרשׁים | |
| 28 | MTושׁני קרשׁים עשׂה למקצעת המשׁכן בירכתים |
| SPושׁני קרשׁים עשׂה למקצעות המשׁכן בירכתים | |
| 29 | MTוהיו תואמם מלמטה ויחדו יהיו תמים אל ראשׁו אל הטבעת האחת כן עשׂה לשׁניהם לשׁני המקצעת |
| SPוהיו תאמים מלמטה יחדו היו תאמים אל ראשׁו אל הטבעת האחת כן עשׂה לשׁניהם לשׁני המקצעות | |
| 30 | MTוהיו שׁמנה קרשׁים ואדניהם כסף שׁשׁה עשׂר אדנים שׁני אדנים שׁני אדנים תחת הקרשׁ האחד |
| SPוהיו שׁמנה קרשׁים ואדניהם כסף שׁשׁה עשׂר אדנים שׁני אדנים שׁני אדנים תחת הקרשׁ האחד | |
| 31 | MTויעשׂ בריחי עצי שׁטים חמשׁה לקרשׁי צלע המשׁכן האחת |
| SPויעשׂו בריחי עצי שׁטים חמשׁה לקרשׁי צלע המשׁכן האחד | |
| 32 | MTוחמשׁה בריחם לקרשׁי צלע המשׁכן השׁנית וחמשׁה בריחם לקרשׁי המשׁכן לירכתים ימה |
| SPוחמשׁה בריחים לקרשׁי צלע המשׁכן השׁנית וחמשׁה בריחים לקרשׁי צלע המשׁכן לירכתים ימה | |
| 33 | MTויעשׂ את הבריח התיכן לברח בתוך הקרשׁים מן הקצה אל הקצה |
| SPויעשׂ את הבריח התיכון לברח בתוך הקרשׁים מן הקצה אל הקצה | |
| 34 | MTואת הקרשׁים צפה זהב ואת טבעתם עשׂה זהב בתים לבריחם ויצף את הבריחם זהב |
| SPואת הקרשׁים צפה זהב ואת טבעתיהם עשׂה זהב בתים לבריחים ויצף את הבריחים זהב | |
| 35 | MTויעשׂ את הפרכת תכלת וארגמן ותולעת שׁני ושׁשׁ משׁזר מעשׂה חשׁב עשׂה אתה כרבים |
| SPויעשׂ פרכת תכלת וארגמן ותולעת שׁני ושׁשׁ משׁזר מעשׂה חשׁב עשׂה אתה כרובים | |
| 36 | MTויעשׂ לה ארבעה עמודי שׁטים ויצפם זהב וויהם זהב ויצק להם ארבעה אדני כסף |
| SPויעשׂ לה ארבעה עמודי שׁטים ויצפם זהב וויהם זהב ויצק להם ארבעה אדני כסף | |
| 37 | MTויעשׂ מסך לפתח האהל תכלת וארגמן ותולעת שׁני ושׁשׁ משׁזר מעשׂה רקם |
| SPויעשׂ מסך לפתח האהל תכלת וארגמן ותולעת שׁני ושׁשׁ משׁזר מעשׂה רקם | |
| 38 | MTואת עמודיו חמשׁה ואת וויהם וצפה ראשׁיהם וחשׁקיהם זהב ואדניהם חמשׁה נחשׁת |
| SPאת עמודיו חמשׁה ואת וויהם וצפה ראשׁיהם וחשׁקיהם זהב ואדניהם חמשׁה נחשׁת |