1שִׁ֗יר הַֽמַּ֫עֲלֹ֥ות זְכֹור־יְהוָ֥ה לְדָוִ֑ד אֵ֝ת כָּל־עֻנֹּותֹֽו׃
not preserved in any manuscript
2אֲשֶׁ֣ר נִ֭שְׁבַּע לַיהוָ֑ה נָ֝דַ֗ר לַאֲבִ֥יר יַעֲקֹֽב׃
not preserved in any manuscript
3אִם־אָ֭בֹא בְּאֹ֣הֶל בֵּיתִ֑י אִם־אֶ֝עֱלֶ֗ה עַל־עֶ֥רֶשׂ יְצוּעָֽי׃
not preserved in any manuscript
4אִם־אֶתֵּ֣ן שְׁנַ֣ת לְעֵינָ֑י לְֽעַפְעַפַּ֥י תְּנוּמָֽה׃
not preserved in any manuscript
5עַד־אֶמְצָ֣א מָ֭קֹום לַיהוָ֑ה מִ֝שְׁכָּנֹ֗ות לַאֲבִ֥יר יַעֲקֹֽב׃
not preserved in any manuscript
6הִנֵּֽה־שְׁמַֽעֲנ֥וּהָ בְאֶפְרָ֑תָה מְ֝צָאנ֗וּהָ בִּשְׂדֵי־יָֽעַר׃
not preserved in any manuscript
7נָבֹ֥ואָה לְמִשְׁכְּנֹותָ֑יו נִ֝שְׁתַּחֲוֶ֗ה לַהֲדֹ֥ם רַגְלָֽיו׃
not preserved in any manuscript
8קוּמָ֣ה יְ֭הוָה לִמְנוּחָתֶ֑ךָ אַ֝תָּ֗ה וַאֲרֹ֥ון עֻזֶּֽךָ׃
11Q5למנוחתכה אתה וא[רון ]ע̇ו̇ז̇כ̇ה̇
9כֹּהֲנֶ֥יךָ יִלְבְּשׁוּ־צֶ֑דֶק וַחֲסִידֶ֥יךָ יְרַנֵּֽנוּ׃
11Q5כוהניכה ילבשו צדק וחסידיכה ירננו
10בַּ֭עֲבוּר דָּוִ֣ד עַבְדֶּ֑ךָ אַל־תָּ֝שֵׁ֗ב פְּנֵ֣י מְשִׁיחֶֽךָ׃
11Q5בעבור דויד̇ עבדכה אל תשב °°° פני משיחכה
11נִשְׁבַּֽע־יְהוָ֨ה׀ לְדָוִ֡ד אֱמֶת֮ לֹֽא־יָשׁ֢וּב מִ֫מֶּ֥נָּה מִפְּרִ֥י בִטְנְךָ֑ אָ֝שִׁ֗ית לְכִסֵּא־לָֽךְ׃
11Q5נשבע יהוה לדויד [אמת ]ל[וא ]ישוב ממנה כי מפרי בטנכה אשית על כסא לכה
12אִֽם־יִשְׁמְר֬וּ בָנֶ֨יךָ׀ בְּרִיתִי֮ וְעֵדֹתִ֥י זֹ֗ו אֲלַ֫מְּדֵ֥ם גַּם־בְּנֵיהֶ֥ם עֲדֵי־עַ֑ד יֵ֝שְׁב֗וּ לְכִסֵּא־לָֽךְ׃
11Q5[אם י]ש̇מ̇ר̇ו בניכה בריתי ועדוותי זה אלמדם גם בנ[יה]ם עודי עד יעלו לכסא לכה
13כִּֽי־בָחַ֣ר יְהוָ֣ה בְּצִיֹּ֑ון אִ֝וָּ֗הּ לְמֹושָׁ֥ב לֹֽו׃
11Q5כי בחר יהוה בציון א[וה ]למושב לו
14זֹאת־מְנוּחָתִ֥י עֲדֵי־עַ֑ד פֹּֽה־אֵ֝שֵׁ֗ב כִּ֣י אִוִּתִֽיהָ׃
11Q5זואת מנוחתי עדי עד פה אשב כי אוית[יה ]
15צֵ֭ידָהּ בָּרֵ֣ךְ אֲבָרֵ֑ךְ אֶ֝בְיֹונֶ֗יהָ אַשְׂבִּ֥יעַֽ לָֽחֶם׃
11Q5[צידה ]ב̇ר̇ך̇ אברך אביוניה אשביע לחם
16וְֽ֭כֹהֲנֶיהָ אַלְבִּ֣ישׁ יֶ֑שַׁע וַ֝חֲסִידֶ֗יהָ רַנֵּ֥ן יְרַנֵּֽנוּ׃
11Q5וכוהניה א[לבי]ש̇ה יש̇ע̇ וחסידיה ירננו
17שָׁ֤ם אַצְמִ֣יחַ קֶ֣רֶן לְדָוִ֑ד עָרַ֥כְתִּי נֵ֝֗ר לִמְשִׁיחִֽי׃
11Q5שם אצמיח קרן לדויד ער̇[כתי ]נ̇ר̇ למשיחי
18אֹ֭ויְבָיו אַלְבִּ֣ישׁ בֹּ֑שֶׁת וְ֝עָלָ֗יו יָצִ֥יץ נִזְרֹֽו׃
11Q5אויביו אלביש בושת ועליו יציץ נזרו
Reading a scroll line
- [ אבג ]
- Grey, in brackets: letters the editor supplied. Where a lacuna runs
over three words or more, only its first and last word are set; the
words between keep their width but are left blank, so the size of the
gap stays visible.
- א̇
- A dot above the letter: the reading is identified but uncertain.
- °
- A letter surviving only as illegible traces.
- .
- A lost letter inside a lacuna.
Everything else in a manuscript line is extant text. The verse-final
׃ is not printed there, and the scroll lines are
consonantal throughout. Sigla are those of the ETCBC dataset.
Hover over any word, in either text, for its lexeme and morphology; on a
touch screen, tap it. A word underlined with dots carries a qere, and the
card gives the form to be read.